Tshiṱori nga: Silas Nduvheni. Ṱhalutshedzo nga: Khathutshelo Raliphaswa.
U bveledza na u pembela vhukoni ha vhafumakadzi kha mabuḓo o fhambanaho ndi zwithu zwi ṱuṱuwedzaho, hone na u avhelwa zwiphuga ṅwaha na ṅwaha ndi maitele ane a ṱuṱuwedza vhasidzana vhatuku uri vhavhe na madzangalelo kha mabuḓo a u fhambana. U fana na ṅwaha munwe na munwe, neḓorobo vha Musina Vho Godfrey Mawela vha khou fhululedza Salome Madida, ane avha rabulasi u bva Nwanedi, kha u avhelwa tshiphuga tsha uvha ramabindu wa nṱha kha sia ḽa vhubulasi kha pfufho dza rabulasi wa vhafumakadzi wa ṅwaha. Vhuṱambo uvhu ho farelwa holoni ya tshitshaha ya Muswodi Tshisimani nga Lavhuṱanu, ḽa fumbili-ṱhanu Ṱhangule, nga vha tshiṱiriki tsha masipala wa Vhembe (VDM) vho farana zwanḓa na vha muhasho wa vhulimi na mveledziso ya vhupo ha mahayani.
Kha vhaeni vha vhuṱambo uvhu, vhe vha hulisa thambo ndi neḓorobo muhulwane wa VDM, Vho Dowelani Nenguda, Vho Godfrey Mawela, Vhamusanda Vho Phathutshedzo Mabulo, na vhaofisiri vha muhasho wa Vhembe wa vhulimi na mveledziso ya vhupo ha mahayani.
"Ri a ḓi hulisa uri munwe washu ane avha rabulasi wa mufumakadzi o pfufhiwa kha muṱaṱisano uyu. Sa masipala wa hayani, rilingedza nga nḓila dzoṱhe uri ri tikedze vhafumakadzi vhane vha khou ḓi imisa nga vhoṱhe kha mabuḓo a u fhambana, vhane vha dzulela u fhufhisela fulaga yashu nṱha," Vho Mawela vha amba.
Pfufho idzo dzo rwelwa ṱari nga vha muhasho wa vhulimi nga ṅwaha wa gidi-ḓaṱahe fuṱahe-ṱahe vha na ndivho ya u ṱuṱuwedza na u engedza dzangalelo ḽa vhafumakadzi u dzhenelela kha vhulimi, hu tshi vhalwa na vhare vhaholefhali. Vhuṱambo uvhu vhu dovha hafhu ha livhuwa nḓila dzine vhafumakadzi vha shela mulenzhe kha u alusa nḓila dza u ḓisela vhathu zwiliwa nga kha mishumo ya u fhambana ya vhulimi, u bva kha u ṱavha hayani, u ya kha uvha na masimu mahulwane.
Muṱaṱisano u farwa nga luṱa lwa u fhambana, u bva kha madzingu a mimasipala, uya kha luṱa lwa mavunḓu na lushaka, zwine zwa swikisa kha pfufho dza lushaka dzine dza farwa mafheloni a ṅwedzi wa Ṱhangule sa izwi hu ṅwedzi wa vhafumakadzi. Vho pfufhiwa nga masheleni, ṱhanziela, na zwishumiswa zwa vhulimi.
Salome ndi mutumbuli wa Matandamavhili Farm Trading and Projects ire Musina. Bulasi yawe i na vhashumi vha swikaho vha fusumbe-raru, hone nga vhuhulwane ndi dzi hekhitha dza furaru hune ha ṱavhiwa maṱamaṱisi, mafhuri, dzi phiri-phiri, na miroho. Nga ṅwaha u a kona u vhuedza masheleni a swikaho zwigidi zwa maḓana a malo furaruthihi. Zwibveledzwa zwawe u rengisela vhupo ho fhambanaho, hu tshi katelwa Tiger Brands, Mozambique na mimakete ya Tswane.