Tshiṱori nga: Elmon Tshikhudo. Ṱhalutshedzo nga: Khathuthselo Raliphaswa.
Ramuzika na muṅwali wa nyimbo dza sialala Junior Sikheli ono sumbedza uvha ramuzika are na nḓivho ya sia ḽa vhumvumvusi sa izwi a na minwaha i swikaho fumi nthihi a kha nḓowetshumo ya muzika, na aḽibamu dza tshivhalo fhasi ha dzina ḽawe.
Mudodzwa Josef Nengudza ane a ḓivhea khwine nga Sikheli Junior kha nḓowetshumo ya muzika o anḓadza aḽibamu yawe yau fhedzisela nga ṅwaha wa gidimbili fumbili, nga tshifhinga tsha Covid. Aḽibamu iyo ye ya vhidzwa A li ngo lala, a ingo shuma zwavhuḓi sa izwi nḓila nnzhi dzau davhidzana dzovha dzo iledzwa, fhedzi izwo zwi simu nyamise kha uvha ramuzika.
Nga ṅwaha wa gidimbili fumi malo o thoma tshiimiswa tshawe tshau rekhoda muzika tshitudio tshawe tshivhidzwaho Athletes Media Production he a khandisa aḽibamu yawe ye ya anḓadzwa nga Lavhutanu, ḽa ṱhanu ḽa Shundunthule, ya Pangula Ndevhe. Aḽibamu iyo ina nyimbo dza fumimbili dzine dza takalelwa nga vhathu u katela na Mufunwa Wanga, Khombo na Diphineni.
Junior Sikheli we a bebwa Tshifudi fhedzi a aluwela Mangondi uri muzika wawe ndi mukhethwa hone ndi wa zwa muya, hone u ṅwala nyimbo dzawe zwi tshi bva kha zwine ene mune ono ṱangana nazwo na zwine a vhona vhanwe vhathu vha tshi ṱangana nazwo. "Ndi sika muzika zwi tshi bva kha zwine zwa kwama vhupo hashu. Kha aḽibamu yanga yau fhedzisela , ine nda vhona i yone ya khwinesa kha aḽibamu dzanga, luimbo, Khombo ndo lu ṅwala ndo livhanya na nḓila ine vhathu vha vhona nau humbula ngayo vhane vho no ri sia shangoni. Mvelele yashu iri laela uri ri phasele vho ri siaho shangoni uri ri vha takadze. Ro no hangwa mvelele yashu , zwine zwa tshinya vhupo hashu. Ahuna mulalo miṱani, hone vhathu vhanzhi zwithu azwi vha tshimbilelei zwavhuḓi. Ari humele kha mvelele yashu zwoṱhe zwi ḓo tshimbila zwavhuḓi," a amba.
Mutheo wa muzika wawe ndi rege nga sialala ya Tshivenda ine ya ṱumana na u sedza mvelele nau kovhana nḓivho yazwo. Nga ṅwaha wa gidimbili fumiraru, o pfufhiwa nga vha South African Traditional Music Awards (SATMA) kha aḽibamu ya khwine ya Tshivenda, Ladzani Shango, ye ya anḓadzwa nga ṅwaha wa gidimbili fumi mbili.