Tshiṱori nga Maanda Bele. Ṱhalutshedzo nga Khathutshelo Raliphaswa.
Kha Govha ḽa Nzhelele, hune vhushai na u shaea ha mishumo zwo ita uri hu vhe na murunzi mulapfu kha miṱa minzhi, tshiimiswa tsha Boko Simango tsho nea tshedza, fulufhelo na tshanduko kha vhadzulapo. Tsho thomiwa miṅwaha miraru yo fhiraho nga Vho Joshua Boko Simango, tshiimiswa tshi fhira u vhofhololwa lwa tshifhinga tshiṱuku, tsho sedza kha thandululo dzi bveledzaho dza u takusa zwitshavha zwi si na zwishumiswa.
Vho Simango, murangaphanḓa ane a vha na dzangalelo kha mveledziso ya tshitshavha, o vhona nndwa dza vhaswa nga ene muṋe nahone a zwi ṱhogomela uri phasela dza zwiḽiwa fhedzi a dzi nga ḓo fhelisa mutevhe wa vhushai. Nṱhani hazwo, o dzhia nḓila yo fhambanaho: u wana miṋeelo u bva kha mabindu, u ṋetshedza vhugudisi ha u shumisana na madzangano apo, na u ṋea vhaswa vhukoni ha u wana zwikhala zwa mishumo.
U bva tshe tsha thoma, tshiimiswa tsho shandula matshilo a sa vhalei nga kha mbekanyamushumo dzo fhambanaho dza u maanḓafhadza vhathu. I ṋetshedza phasela dza zwiḽiwa kha miṱa ine ya khou shaya, fhedzi zwa ndeme vhukuma, i ṋetshedza zwikhala zwa tshifhinga tshilapfu u fana na khoso dza khomphyutha dza mahala, ngudo dza u reila tshikoloni, na thuso ya mushumo.
Zwovhuyedza vhanzhi, tshiimiswa itshi tsho shandula vhutshilo. Tshilidzi Mudau, wa minwaha ya fumbili-thanu u bva Ha Rabali, ndi munwe wa vhaswa vhe vha vhuyelwa nga vhuḓidini ha Simango. "Ndo vha ndi tshi khou kundelwa u wana mushumo, nahone hu si na tshenzhemo kana vhukoni, zwo pfala zwisakonadzei. Fhedzi nga kha Boko Simango Foundation, ndo wana vhugudisi ha tsireledzo, nahone hu sa athu fhela vhege, ndo wana mushumo. Zwino, ndi nga ṱhogomela muṱa wanga," o amba izwo.
Simango u tenda uri mvelaphanḓa ya vhukuma i itea musi zwitshavha zwi tshi ṱangana u itela u tikedzana. "Ri nga si kone u lindela muvhuso u tshi lugisa thaidzo dzashu dzoṱhe. Arali ri na vhukoni ha u thusa, ri fanela u ita nga u ralo. Muloro wanga ndi u vhona vhaswa vhanzhi vha tshi ḓiimisa nga vhoṱhe na u shumisa vhukoni havho u itela u takusa vhaṅwe," vho ralo.