Tshiṱori nga Thembi Siaga. Ṱhalutshedzo nga Khathutshelo Raliphaswa.
Ndivhuwo Khadziani (20) u bva Malamulele - ane a ḓivhiwa khwine nga dzina ḽawe ḽa luvhanḓeni ḽa Skeem Mafenya - u khou ṱavhanya u ḓi sikela dzina kha nḓowetshumo ya zwa miswaswo hanefha hayani.
Mutambi wa miswaswo ane a khou aluwa, muḓivhi wa vhuṱambo na muimbi u ḓivhelwa mafhungo awe a kwamaho, vhabvumbedzwa vha sa hangwei na u ṱanganedza zwithu zwi re na vhushaka zwe zwa kunga mbilu dza vhathu vha mivhunduni ya tsini.
Vidio dzawe pfufhi, dzi re na mafulufulu dzi khou vhonetshela nyanḓadzamafhungo ya matshilisano, zwi tshi mu ita uri a vhe na vhafuni vha fulufhedzeaho na vhane vha khou aluwa nga u ṱavhanya. U bva nga ṅwedzi wa Lambamai, Skeem Mafenya o ḓihudza nga vhatevheli vha ṱoḓaho u vha 200,000 kha Facebook na vhane vha takalela 308,000 kha TikTok, na dziṅwe dza vidio dzawe dzine dza kunga vhathu vha fhiraho 3.5 miḽiyoni kha zwiṅwe zwa zwileludzi zwa vhudavhidzani ha matshilisano.
U bvisa ṱhuṱhuwedzo u bva kha nyambo dzapo, vhutshilo ha ḓoroboni na tshenzhemo dza matshilisano dzo ṱanganelanaho, zwi re ngomu hawe zwi pfala zwi tshi pfala vhukuma na vhafuni. "Ndo thoma mathomoni a ṅwaha wo fhiraho nga murahu ha u tamba kha mbekanyamushumo ya vhukoni ha kereke ya henefho. Ndo wina mbilu dza Gogo ya vhathu nga u ṱanganedza hanga. Ndi henefho he zwoṱhe zwa thoma hone," u a elelwa.
U bva henefho, o thoma u tamba na u shuma sa Mutshimbidza Mushumo, a tshi ḓisa maanḓa na u dzhenelela kha zwiitea zwa tshitshavha. Nga u ṱavhanya, u bukiwa zwo thoma u dzhena. Nga tshifhinga tshithihi, o ḓidzhenisa kha muzika wa lekompo, nahone nyimbo dzawe dzo vhalaho zwino dzi khou wana ṱhuṱhuwedzo - zwihuluhulu luimbo lwawe lwo bvelelaho, Rivonia.
O ita na u khoḓiwa nga vhatambi ngae vha zwa u ḓimvumvusa, u katela na muimbi a ḓivheaho wa Xitsonga Solly Makamu wa Mafenya Brothers.
"Nyimbo yanga i amba nga ha zwine ra khou tshila, zwine ra zwi vhona, zwine ra amba. Ndo vha ndi si na khamera mathomoni, ngauralo ndo shumisa founu yanga nahone zwenezwo a zwo ngo nnyimisa. A u ṱoḓi zwishumiswa zwa maṱhakheni kana mugaganyagwama muhulwane – nga founu yaṋu fhedzi, vhupo haṋu na ipfi ḽaṋu ni nga swikela zwithu zwinzhi vhukuma hone zwi takadzaho vhaṅwe vhathu," o ralo.
U ṱuṱuwedzwa nga tsumbo yawe, Skeem Noa, Skeem Mafenya o shandula lutamo lwawe lwa vha nḓila ya u ḓitshidza. Zwino u na fulufhelo ḽa u ṱuṱuwedza vhaṅwe vhaswa vha zwitshavha zwa mahayani na vha ḓoroboni uri vha tende kha vhukoni havho.
"Muloro wanga ndi u ya kha dzitshaka na u shuma na vhahali kha nḓowetshumo."