Tshiṱori na ṱhalutshedzo nga: Khathutshelo Raliphaswa.
Ṱano ḽa ṅwaha na ṅwaha ḽa Makhado ḽo vhuya hafhu nawaha, ḽi khou sumbedza u ḓou mvumvusa vhoṱhe, vhaṱuku na vhahulwane. Ṱano iḽi ḽi ḓo itelwa mudavhini wa tano wa Makhado lwa maḓuvha maṋa, u bva nga ḽa fumbili rathi u swika ḽa fumbili-ṱahe Fulwane.
Hu khou lavhelelwa u swika vhathu vha zwigidi zwa furaru-ṱhanu kha maḓuvha aya maṋa. Hu ḓovha na tshaka nnzhi dzau mvumvusa vhathu, u bva kha miswinki, mitambo ya muṱa, ḓikiṱa ḽa muzika na u lavhelesa matambwa. Hu ḓo dovha hafhu ha rengiswa na vhunzhi ha zwithu zwine zwa ḓo funwa nga vhadali kha ṱano iḽi zwi ngaho zwitambiswa zwabana, zwiḽiwa uya ngau fhambana, zwiambaro na zwinwe zwinzhi.
Ṱano iḽi ḽi ḓo dovha hafhu ḽa ṋea vhagudiswa tshikhala tshau wana nḓivho dza mabuḓo ane vhaa takalela kha mihasho ya muvhuso, dzi sekhithara dzau fhambana na minwe minzhi. Hu ḓo dovha hafhu ha rambiwa vha zwiimiswa zwi fanaho na magudedzi a nṱha, dzi yunivesithi, na vhupo hau gudisa vhathu mishumo yau fhambana. Khau engedza zwiimiswa izwo zwo rambiwaho, hu dovha hafhu ha vha na vha zwiimiswa zwa migodini, mavhengeleni, na zwiṱitshi zwa dzi radio zwine zwa yelana na mabuḓo ane vhagudiswa vhaa takalela ane a ḓo vha thusa nga zwikhala zwa khwine zwa mishumo.
Ṱano iḽi ḽi ḓo thoma lwa tshiofisi nga Lavhuraru ḽa fumi rathi Fulwi, nga vha ofisi ya masipala vha tshi i rwela ṱari. Nga Lavhuna, vhathu vhane vha ḓoḓa, vha ḓo mvumvuswa nga mitshino ya sialala, mitambo ya sialala na matambwa a fhano hayani.
Lavhuṱanu ḽa fumbili malo, hu ḓovha na ṱano ḽa matambwa, mitambo ya masiapala yau fhedzisela, mitambo ya mavili, na ḓikita ḽa gosipele ḽine ḽa ḓo thoma nga awara ya vhuraru nga masiari. Hu ḓovha na vhaimbi vha fanaho na Rofhiwa Manyaga, Ngudo Praise, Masana, na vhanwe vhanzhi.
Hu khou lavhelelwa vhathu vhanzhi nga ḓuvha ḽau fhedzisela ḽa Mugivhela wa ḽa fumbili-ṱahe, hu ḓovha na mitambo minzhi, na ḓikiṱa ḽa mizika yo fhambana u bva nga awara ya vhuraru, hune haḓo imba vhaimbi vhanzhi vha lushaka u fana na Gusba Banana, Asa Tee na vhanzwe vhanzhi.
U wana zwidodombedzwa zwinzhi nga ha ṱano iḽi, vha nga kwama Muimeleli Veronica Nelwamondo kha 082 962 4964 kana Vhahangwele Nicholus Netshifhefhe kha 068 032 0807.