Tshiṱori nga: Community builders. Ṱhalutshedzo nga: Khathutshelo Raliphaswa.
Dzina ḽa "Mubishopho Khorommbi" ḽi khou leleḓa kha zwilelu zwa vhudavhidzani ha vhushaka u fana na TikTok, izwi ndi nga murahu hau anḓadza thabelo ya maanḓa manzhi na vhatevheli vhavho, thabelo iyo ipfi 'Thabelo ya Mato'.
Vha nyanḓadza mafhungo ya Limpopo Mirror vho ḓou lingedza u wana munna wa thabelo iyo he vha mu wana kha kusi kwa Khubvi hu ne a dzula hone zwa zwino. Zwivhuya Khorommbi wa minwaha ya fumbili-malo, ndi mutumbuli wa kereke ya Bethel Zion Apostolic Church.
Thabelo iyo iri: "Ndi fara nda kaidza nda thuthekanya nda somba nda tsika nda hunga nda kwanya nda vhofha nga dzina la Yesu, Zwino! Zwoṱhe zwine zwa tama u takutshela nṱha zwa u nṱhupha, u ntambudza na u ntshengedza. Ndi ri Sathane ha na maanḓa, ha na ndugelo, ha na u kona, ha na mukovhe vhutshiloni hanga. U songo tenda vha madambi na vhutulu, dzinanga mmbi na vhaporofita vhavhi na vhaloi vha tshi nga huvha mihuvho vha tshi nga ri koṱo, ro kona iwe Yehova u hone. Ndi imedzana na mamuya oṱhe, mamuya a tshibakabaka, mamuya a swili, mamuya a tshipimbi, mamuya a vhonemashango vha shango lino, mamuya a swili. Zwino! Amen!".
Vho Khorommbi vho bebwa muvhunduni wa Tswera he nga murahu vha pfulutshela kha kusi kwa Khubvi nga ṅwaha wa gidimbili. Vha tenda khauri mvumbo yavho kha zwileludzi zwa vhudavhidzani zwo ḓa sa vhukhakhi. "Nga vhuvha hanga, athi muthu ane a tevhela u ḓivhiwa kana uvha muthu wa dzina la nṱha kha tshitshavha. Ṅwaha wo fhelaho ndovha ndi si muthu ane a tevhelela zwa vhuleludzi ha vhudavhidzani, fhedzi muṅwe wa miraḓo ya tshivhidzo tshanga, Vho Glory Ntshavheni, vho ḓou anḓadza vidiyo yanga ndi khou rera nga tshifhinga tsha tshumelo. Nḓila ye vhathu vha takalela ngayo vidiyo iyo zwovha zwavhuḓi vhukuma, lwe nda thoma u wana ṱhingo ubva kha vhathu vha tshi khoḓa pfunzo yanga. Nga zwenezwo ndo ḓou ḓi dzhenisa kha zwa vhuleludzi ha vhudavhidzani uri ndi kone u swikelela vhathu vhanzhi nga pfunzo dzanga," vha amba.
Vha tenda zwauri vho nangwa nga mudzimu uri vha thuse vhathu, sa izwi vho bebwa vha aluswa kerekeni. "Ndo aluwa fhasi ha pfunzo dza Bishop Lungisani Khavhadi, vhe vha shela mulenzhe kha zwine ndavha zwone ṋamusi. Vho mpfunza nga hau vhala nau guda bivhili na ndila dza uḓi lugisela u rera. Nangoho mudzimu vha shumisa vhathu vhavho u ḓisa tshanduko shangoni. Athingaḓo vuwa ndo hangwa Bishop Khavhadi na nḓila ye vha shela mulenzhe kha nyaluwo yanga kha zwa muya," vha amba.
Vho Khorommbi vho engedza zwauri ubva tshe "Thabelo ya Mato" ya leleda kha zwileludzi zwa vhudavhidzani, vha khou wana ṱhingo ubva kha vhathu vha tshi vha ramba uri vhaḓe vha rere fhethu ho fhambanaho kha tshiṱiriki tsha Vhembe. "Naho ndi muthu ane a dzula ndi na mishumo yanga, ndi kombetshedzea u ya hu ne nda khou rambiwa hone sa izwi mudzimu vho tou nthuma uri ndi shume mushumo uyu fhano shangoni. Ndi vhudza vhathu vhane vha nthamba uri vha songo hudza dzina ḽanga fhedzi, vha fanela u hudza dzina ḽa mudzimu vhe vha nṋea heyi mpho, ine ya khou shandukisa matshilo a vhathu lwa tshimuya."
Vho sasaladza vharangaphanḓa vha zwivhidzo vhane vha ḓi wana vha kha tshanḓa tsha monde tsha mulayo. "Mudzimu u khou vha ṱana nga ha nḓila dzavho dza mazwifhi na zwine vha ita maswiswini. Ri fanela u vha rabelisa, uri vha kone u vhona tshedza," vha amba vha tshi vhina.