Tshiṱori nga: Victor Mukwevho. Ṱhalutshedzo nga: Khathutshelo Raliphaswa.
Aḽibamu ya ramuzika wa rege na muzika wa sialala, Rolitshana, Vho-Gregory "The guitar man" Rangolo i khou tshimbila zwavhuḓi kha nḓowetshumo ya muzika. Iyi aḽibamu vho i bvisa ṅwaha wo fhelaho, Nyendavhusiku.
Ndi aḽibamu ine ya amba nga ha u tambudzana na mabulayo ane a itea vhukati ha vhafunani. Kha aḽibamu iyi vha imba nga ha uri arali lufuno lwo fhela vhukati ha vhafunani ndi khwine vha tshi fhambana vha saathu u vhulayana.
Avha ramuzika vha bva kusini kwa Tshitereke tsini na vhuongelo ha Donald Fraser. Vho rathela kha nḓowetshumo ya muzika nga ṅwaha wa 1995 nga aḽibamu ya Tshamuninga.
"Aḽibamu yanga yo ita bvumo kha zwititshi zwa dzi radio zwo fhambanaho nga tshifhinga tshiṱuku, zwe zwa nṱuṱuwedza uri ndi shume khau bvisa aḽibamu ya vhuvhili ya Vhamutivhili. Nayo yo bvelela zwavhuḓi lune na vhabveledzi vha muzika vho thoma u ṱoḓa muzika wanga u tshi tambiwa kha mishumo yavho u mona na vunḓu ḽa Limpopo," vha ralo.
Nga nwaha wa 2009 vho bvisa aḽibamu, Vhahashi, ye ya shuma zwavhuḓi kha nḓowetshumo ya muzika.
"Hei ndi yone aḽibamu yanga ya khwine u bva tshe nda thoma zwa muzika. I amba nga hau tambudziwa ha mbeu.Vhathu vhanzhi vha khou lovha kha dzi mbingano na vhushaka hau funana. Zwi thusa mini u vhulaha muthu ngauri ha tsha u funa?," vha vhudzisa. Vho-Rangolo vhari ndi khwine u fhambana arali lufuno lwo fhela.
"Sa vhoramuzika, rina mushumo wau funza nau mvumvusa vhathu. Ri fanela u eletshedza vhathu uri zwauri vhuṱungu vhu fhaṱa lufuno vhukati ha vhathu vhavhili a touvha mavharivhari," vha engedza.
Mofolo Rangolo ane avha mukomana wa Vho-Gregory a dovha hafhu avha ramuzika ndi ene ovha funḓedzaho u tamba kaṱara vha na minwaha ya sumbe. Sa izwi vha kha vhurereli ha rege, vhari vho guma u gera mavhudzi nga ṅwaha wa 1993 vha tshi vha muraḓo wa vhurereli uhu. "U fana na Simisoni we ra mi vhala bivhilini, maanḓa anga a kha mavhudzi," vha tshi vhina.