Tshiṱori nga: Victor Mukwevho. Ṱhalutshedzo nga: Khathutshelo Raliphaswa.
Thendo Rathiyaya wa minwaha ya furaru-thihi ane a ḓivhelwa u reila gariki ya dzi donngi o dovha hafhu a mvumvusa vhathu vha Tshilamba a tshi ṱwa a khou reila atshi mona mona na ḽa Tshilamba nga gariki yawe e na tshigwada tsha vhana vhaṱuku vho ḓi ṱama nga zwiambaro zwa sialala. Izwo o zwi ita nga hone u pembela ḓuvha ḽa vhufa nga Musumbuluwo wa ḽa fumbili-ṱhanu Khubvumedzi. Ho ḓou ḓala mifhululu na dzi khuwa vhathu vho takalela u vhona Thendo a tshi tou reila na u paka sa mureili makone wa ṱiraka.
Thendo ha thomi u vha ṱhoho dza mafhungo nga hone u reila gariki yawe ya donngi, nga ṅwedzi wa Lambamai ṅwaha-uno o ḓou fhelekedza vhafunani vhe vha vha vha khou malana nga mutshato hanefhala Tshilamba nga yone gariki ya dzi donngi.
Kha nyambedzano na vha nyanḓadza mafhungo ya Limpopo Mirror, Thendo uri zwa u reila gariki khae zwo thoma minwaha ya mahumi mavhili yo fhiraho. "Vhabebi vhanga na vho makhulu anga vho vha vhe vhathu vhane vha reila dzi garaiki dza dzi donngi ndi tshe muṱuku, vha ḓa vha ngudisa sa izwi ndovha ndi tshi ḓi vha fhelekedza zwinwe zwifhinga u ka maḓi na u gobela. Ndo zwi guda ndi na minwaha ya fumi fhedzi, ndi he nda thoma hone," a amba.
Thendo u ḓi hudza nga uvha munwe wa vhareili makone vha gariki ya dzi donngi, zwihulu sa izwi a musidzana. "U reila gariki ya dzi donngi na u namela zwayo asi zwithu zwine zwa kha ḓi pfi ndi zwa vhanna fhedzi musalauno. Na rine vhafumakadzi ri azwi kone u lingana navho. Ndia thusa vhathu nga u vha hwalela zwithu u bva Tshilamba na zwinwe zwisi zwa tsini, vha mbadela zwezwo zwiṱuku," a engeda.
Thendo u khou ramba vhasidzana (vhaswa) uri vha ḓe a vha gudise u reila gariki ya dzi donngi. U dovha hafhu avha na tshumelo dzi fanaho na u fhelekedza vhafunani mitshatoni, kha maguvhangano a lushaka, miṱanganoni ya lushaka, na vhuṱambo vhunzhi.