Tshiṱori nga: Elmon Tshikhudo. Ṱhalutshedzo nga: Khathutshelo Raliphaswa.
Thikhedzo Muroka wa minwaha ya fumbili-raru, wa u bva Nzhelele, u khou ḓi sikela dzina kha bindu ḽawe ḽau runga nga uḽu. Thikhedzo o thoma bindu ḽawe nga ṅwaha wa ḓaṱahe fumiṱahe musi vhabebi vhawe vha tshi xelelwa nga mishumo. Nga ṅwaha uyo ovha e na minwaha ya fumiṱahe, hone ngau vhona uri ahuna vhathu vhane vha ḓo vha ṱhogomela, a thoma nḓila dza u dzhenisa masheleni hayani. Ori u wana nḓila yone yone yau runga nga uḽu, a vhona uri a thome bindu khazwo hone bindu iḽo ndi bindu ḽi tshimbilaho zwavhuḓi.
Nga ḽa fumbili ṱhanu Luhuhi ṅwaha-uno, Thikhedzo opfufhwa nga masheleni na pfufho kha tshitenwa tsha vhubveledzi ha zwiambaro kha muṱaṱisano wa Atas. Nga uvha na nḓivho ya vhubindudzi, a shumisa masheleni ayo u alusa bindu ḽawe.
"Musi vhabebi vhanga vha tshi xelelwa nga mishumo yavho, ndovha ndi khou gudela zwa civil engineering kha gudedzi ḽa kholedzhi ya Vhembe TVET ḽire kha vhupo ha Makwarela. Ndori u vhona nyimele ye ravha ri khayo, nda humbula nga dzi nḓila dzine ra ḓo dzi shumisa u leludza matshilo ashu nauri nne ndi bvele phanḓa na ngudo dzanga. Ndari zwezwi ndi kha zwileludzi zwa vhudavhidzani, nda ṱangana na vidio dzau runga khalubuvhi lwa YouTube, ya nkunga maṱo nda vha ndo wana nḓila yanga yau leludza vhutshilo," a amba.
U runga ha Thikhedzo zwo thoma nga ḓuvha ḽe a shumisa masheleni au namela, he a renga uḽu na nelete, a thoma u runga. Zwa zwino ua kona u runga zwiambaro zwo fhambanaho, hone u ṋea vharengi vhawe zwine vha zwi takalela.
"Ndo ṱuṱuwedzwa nga ṱhama yanga, Maipfi Nengovhela na vhabebi vhawe uri ndi thome bindu ḽanga. O dovha hafhu a nṋea thikhedzo ye ya nṱuṱuwdza kha uri ndi shume zwavhuḓi u alusa bindu ḽanga. Ndori ndi tshi ṱangana na zwikhukhulisi, a ngeletshedza uri ndi songo nyama kha bindu ḽanga. Zwe zwa nṱuṱuwedza u thoma bindu iḽi ndi uri ndi bindu ḽine vhathu vhanzhi a vhaho khalo, sa izwi vhathu vhanzhi vha tshi teledza u dzula fhasi vha tou runga. Ndi vhanzhi vhathu vhane vha ḓa u renga zwibveledzwa zwine nda runga. Ndi dovha hafhu nda takalela uri ndi mushumo une nda u takalela. U kunda hanga masheleni kha muṱaṱisano wa Atas zwo nthusa u renga zwinwe zwishumiswa, zwe zwa alusa bindu ḽanga," a engedza.
Thikhedzo u ṱuṱuwedza vhanwe vhaswa uri vha ḓi sikele mishumo nau shumisa zwine vhavha nazwo u khwinifhadza nyimele dzine vha vha vha khou ṱangana nadzo.
U wana zwidododombedzwa nga vhudalo zwa bindu ḽa Thikhedzo, vha nga mu tevhela kha siaṱari ḽawe ḽa Facebook (Thikhe's Crochet Designs).