Translated by Khathutshelo Raliphaswa
Nga ṅwaha wa 2020, tshigwada tsha vhaswuhana vhau bva Maebane vho thoma thimu ya khirikhethe kha kusi kwavho huu itela u tumbula vhukoni nau nea vhaswuhana zwikhala zwa uḓi netshedzela kha mutambo uyu.
Murangaphanḓa wa thimu iyi, Thakhani Ligaraba, uri Maebani Cricket Club yo thomiwa hu nḓila yau netshedza vhana vha mivhunduni i shayaho zwikhala zwau guda nau tamba khirikhethe u fana na vhana vhau dzula ḓoroboni.
Ligaraba o funa mutambo wa khirikhethe a tshi khaḓi touvha na minwaha ya rathi fhedzi. "Ndi nau takalela khirikhethe ngauri yo nnea zwikhala zwinzhi nda dovha hafhu nda guda vhukoni ha zwa vhutshilo. Ndo no endela mashango manzhi vhukuma nau fhaṱa vhushaka na vhanwe vha vhatambi vha khirikhethe. Ndi dovha hafhu nda funa khirikhethe ngauri ndi guda uvha na vhuḓikali nau kona u ḓi sumbedzisa kha vhathu. Khirikhethe ndi mutambo u mvumvusaho vhukuma."
Thakhani uri vhovha vha tshi ṱoḓa u fhaṱa mvelele ya khirikhethe kha vhupo ha Ha-Kutama huu itela u phulusa vhana kha uḓi dzhenisa kha vhugevhenga na zwidzidzivhadzi nga uvha gudisa mitambo ya dzi tshakatshaka."Nga kha nyambedzano dzau sudzulusa zwithu kha sia la khirikhethe, ndi zwa vhuṱhogwa uvha na zwiimiswa kha mivhundu hune vharema vha dzula hone," hu amba Ligaraba.
Thakhani a tshi vhudzisiwa uri ṋa huna zwifhaṱo zwo fanelaho zwa khirikhethe, uri hovha huna nzudzanyo dzau fhaṱa tshifhaṱo tshine tsha ḓo shumisiwa kha zwithu zwa dzi tshakatshaka hune vhathu vha Maebane vha ḓo dzula nau tshila kha tshiimo tsha khwine. "Musi huna thimu ya khirikhethe Maebane, vho ramabindu vha ḓo wana zwikhala zwau vhulungela kha vhupo uho, zwine zwa nga khwinifhadza tshiimo tsha vhupo uho. Vhana vhane vha tamba khirikhethe vha ḓo wana tshikhala tsha uri linwe ḓuvha vha ḓou tou shuma u tamba khirikhethe kha dzi thimu khulwane vha wana na zwikhala zwau dzhena magudedzini a nṱha fhano Afurika Tshipembe na kha manwe mashango."
Thimu iyi ikha nzudzanyo dzau thoma khirikhethe kha zwikolo zwa hanefha kha vhupo ha Ha-Kutama, zwine vha fulufhela uri zwi ḓo khwinifhadza zwikolo na thimu ya tikidziwa nga vho ramabindu.
Vhathu vhoṱhe vhane vha toḓa u tamba khirikhethe vho ṱanganedziwa kha thimu ya Maebane. "Ri na vhatambi vha minwaha ya 6 u swika ha minwaha ya 20, fhedzi munwe na munwe o ṱanganedziwa. Ari humisi muthu," hu amba Ligaraba.