Ṱhalutshedzo nga Khathutshelo Raliphaswa.
Musi minwaha i tshi khou ṱavhanya u mu swikelela, Thinandavha Goodman Ravhutsi wa miṅwaha ya 41 u ṱoḓa u humbulwa sa muṅwe wa vhatambi vha khwine vha mavili vha phurofeshinala vhe vha bvelela u bva vhuponi ha mahayani Makonde, tshipembe ha ḓorobo ya Thohoyandou. O pfa tshifhinga tshawe kha ligi ya musangwe tsho fhela nahone zwino u khou ṱoḓa u dzhena kha vhuimo ha vho ramavili vha phurofeshinaḽa. U itela u bveledza muloro uyu, u ṱoḓa vhagudisi na vhaṱuṱuwedzi vhane vha ḓo mu tikedza.
"Ndo vha ndi tshi khou shela mulenzhe kha miṱaṱisano wa musangwe lwa yshifhinga tshilapfu nahone zwino ndi tshifhinga tsha uri ndi ṱhaphudze kha zwa mavili a phurofeshinaḽa. Khaedu yanga khulwane zwino ndi u wana vhathu vhane vha ḓo nthusa u bveledza muloro wanga. U bva maḓuvhani a vhuṱuku hanga, ndo vha ndo ana uri ḽiṅwe ḓuvha ndi ḓo vha mutambi wa mavili wa phurofeshinaḽa ane a ḓo ita luswayo kha vho ramavili vha Afrika Tshipembe," o ralo.
O thoma u funa zwa mavili a tshe muṱuku. "Makhulu wanga vho lovhaho, Vho Salmon Balance Ravhutsi, vho vha vhe muhali wa musangwe we a vha a tshi ofhiwa u mona na Venda. Musi vha tshi fhira shangoni, ndo ana uri ndi ḓo dzhia pfumo nda isa phanḓa na ifa ḽavho. Zwino ngauri zwithu zwi khou shanduka, ndi tenda uri ndi tshifhinga tshavhuḓi tsha u thoma ndima ntswa."
Vho Ravhutsi vhari vho vha vha tshi gudisa duvha na duvha, nga matsheloni na nga madekwana. "Naho ndi si na fhethu hau gudela ho teaho, ndi ita nga hune nda nga kona ngaho uri ndi dzule ndo khwaṱha. Bege yanga yau ita dzi nḓowenḓowe ndi khonani yanga khulwane – I ita uri ndi dzule ndo farakanea ḓuvha ḽiṅwe na ḽiṅwe. Ndi khwine sa fiddle nahone ndi ḓo fhelisa mutambi wa mabogisi muṅwe na muṅwe wa phurofeshinala ane a ḓa nḓilani yanga," o ralo.
"Ndo no lwa na u wina nndwa dzi sa vhalei dza musangwe nahone nda fhaṱa vhafuni vhanzhi. Ndo vhuya nda lwa na Ngwazi, nndwa ya musangwe i re na bvumo, nahone nndwa yo fhedza mimunithi i fhiraho 10, hu si na na muthihi washu we a humela murahu. Vhadzudzanyi vho zwi imisa vha sa ḓivhadzi muwini ngauri vho vha vha tshi khou wela fhasi sa tshifhaṱuwo tshanga. Zwiṱhavhane a zwi lingani."
U bva tsheetsho, a hu na muthu we a vha a tshi ṱoḓa u sedzana na nṋe - vha a zwi ḓivha uri zwiṱhavhane zwanga a zwi lingani."
Vhane vha tama u mu thusa vha nga mu kwama kha 079 350 3582 kana nga Facebook (Thinandavha Gman Ravhutsi).