Tshiṱori nga Elmon Tshikhudo. Ṱhalutshedzo nga Khathutshelo Raliphaswa.
Khwaira ya maanḓa ya Thohoyandou Mudzimu ndi Lufuno yo no vha swole lwa miṅwaha i fhiraho mahumi mararu. Tshigwada tsho thomiwa nga nwaha wa 1993 nga khonani tharu – Doctor Love Khorommbi, Edward Shandukani, na Colbert Tshililo – muvhunduni wa Mphego nnḓa ha Ṱhohoyanḓou. Nga Swondaha ya ḽau thoma Nyendavhusiku, vho pembelela miṅwaha ya vhugala ya 31 ya u vha hone.
Vhuṱambo, madekwana a pfanaho a thendo na vhurabeli, hune dzikhwairi dzo ṋekedza muzika wadzo wa nṱhesa, ho vha hone ngei Thohoyandou Library Gardens.
Kha dzikhwairi dze dza takadza vhaeni ho vha hu na khwairi ya Seshego Gospel Choir, tshimbila nḓila yoṱhe u bva Polokwane u itela u ṱanganela kha vhuṱambo. Tshithu tshihulwane tsha tshenetsho tshiitea ho vha musi miraḓo ya khwairi na vhaeni vha tshi ḓiphina nga khekhe dzo vhalaho dzo bakiwaho lwo khetheaho u itela vhuṱambo honoho.
Vhane vha tikedza khwairi miṅwahani yo fhiraho vho ṱhonifhiwa nga ṱhanziela dza u livhuwa nau hulisa u shela havho mulenzhe.
Murangaphanda wa tshigwada na mutumbuli Vho Dokotela Love Khorommbi vhari vho takala u pembelela minwaha minzhi ye vha i fhedza vha tshi khou shumela zwitshavha nga muzika wavho wa muya. "Ri na mihumbulo minzhi ya u vha kha nyimele iyi ya u pembelela. Ngauralo khwairi nnzhi dzo ḓa dza ṱuwa, fhedzi ro dzula ro khwaṱha, naho miraḓo yo ḓa ya ṱuwa. Ri vhaṅwe vha khwairi dzi si gathi dzo salaho, nahone ro takala uri vhunzhi ha miraḓo yashu ya u thoma i kha ḓi vha miraḓo ya tshigwada tshashu," vha amba.
Vho Khorommbi vho engedza nga uri khwairi yo bvisa dzi CD na dzi DVD nnzhi kha miṅwaha yo fhiraho nahone yo shela mulenzhe kha zwithu zwinzhi zwihulwane, hu tshi katelwa na bepha ḽa Mapungubwe ḽine ḽa ṱhonifhiwa vhukuma. "Hezwi zwi ṱoḓa uri vhavha pembele mvelephanda ya tshigwa tshashu, nahone ndi zwine ra khou zwi ita," vha amba.
Vho Khorommbi vho amba uri khwairi i ḓo vha i tshi khou ita mabepha o vhalaho nga tshifhinga tsha madakalo. Vho dovha vha amba uri vha khou dzudzanya u kanḓisa aḽibamu ntswa na DVD, fhedzi zwenezwo zwi ḓo ḓitika nga mafunda a vhafuni vhatikedzi vhavho uri vha kone u badela mushumo uyu.