Tshiṱori nga: Kaizer Nengovhela. Ṱhalutshedzo nga: Khathutshelo Raliphaswa.
Mugidimi makone Timothy Munzhelele wa minwaha ya furaru thanu a bvaho kusini kwa Makonde u ḓovha munwe wa vhagidimi kha mbambe ya u gidima mithara ya ḓana (100km), iyi ndi mbambe yau gidima i fhiraho dzoṱhe u mona na ḽifhasi ine yo dzudzanywa nga vhatsireledzo ya Nord na mugidimi makone Aleksandr Sorokin. Muṱaṱisano uyu uḓo farelwa Vilnius, Lituania nga Sondaha ino ya la fumiiṋa Shundunthule.
Aleksandr Sorokin ndi mugidimi makone we a ita ṱhoho dza mafhungo u mona na ḽifhasi nwaha wo fhelaho a tshi fhedza mbambe nga awara dza rathu, minete miṱanu na sekenze dza fuiṋa. Sorokin ono vunḓa rekhodo ṱhanu u mona na ḽifhasi, kha mbambe dza mutalo na badani, u bva kha kholomitha dza ḓana uya kha u gidima lwa awara dza fumbiliina. Sorokin oḓi imisela u vunḓa hafhu rekhodo kha mbambe ya Sondaha, na thuso ya vhanwe vhagidimi u mona na ḽifhasi.
Kha vhagidimi vha Afrika Tshipembe ho rambiwa, Timothy Munzhelele na Craig Cynkin, u dzhenelela mbambe iyi. Vha Lithunian Athletis Federation, vho farisana na vha tshiimiswa tsha Lithuanian Ultra Runner vha ḓo vha vhone vhau langula mbambe iyi.
Munzhelele ane avha muraḓo wa kiḽaba ya Murray & Roberts, uri una fulufhelo uri uḓo shuma zwavhuḓi kha mbambe iyi. Zwa zwino ukha tshiimo tshavhuḓi zwi tshi tevhela u wina kha mbambe ya Spar Tzaneen Tuffy 4-in-1 nga ṅwedzi wa Ṱhafamuhwe ṅwaha uno.
Munzhelele ovha o fanela o dzhenelela kha mbambe ya Two Oceans ṅwedzi wo fhelaho, fhedzi a kundelwa uya sa izwi o rambiwa kha mbambe ya Europe hune u khou ḓi lugisela.
"Ndo ḓi lugisela mbambe ya khiḽomitha dza ḓana, sa izwi hu yone mbambe khulwane ndi saathu u dzhenelela mbambe ya Combrades, ndoita nḓowe-nḓowe uri ndi kone u gidima zwavhuḓi nga Sondaha. Na zwiḽiwa zwine nda khou ḽa ndi zwine zwa ḓo nthusa ndi tshi gidima tshikhala tsha Sondaha. Ndi ṱoḓa u shumisa mbambe ya Sondaha sa u nṋea fulufhela ndi tshiya u dzhenelela mbambe ya Combrades. Ndi na fulufhelo kha nne mune uri ndi ḓo fhedza mbambe iyi nga tshifhinga tshavhuḓi. Ndi ṱoḓa u fhedza nga awara dzi sa swiki awara dza sumbe," a amba.
Uri u pfa o hulisea u wana thambo yau imelela Afrika Tshipembe kha mbambe ya Europe. "Ndi tshikhala tshavhuḓi uri ndi ṱaṱisane na vhathu vha nnḓa ha Afrika Tshipembe," a engedza.
Mugudisi wa Munzhelele, Vho-Takalani Mavhona, vhane vha dovha vhavha mudzulatshidulo wa kiḽabu ya Vhembe Athletics, vhari vha khou shumisa masheleni avho u tshimbidza Munzhelele hoṱhe hune aya, hone nga thikhedzo anga swika kule. Vhari vhana fulufhelo uri Muzhelele u ḓo vhuya na tshiphuga kha mbambe heyi.