Tshiṱori nga: Thembi Siaga. Ṱhalutshedzo nga: Khathutshelo Raliphaswa.
Nga ḽa fumisumbe Fulwi, Antony Makatu, ane a ḓivhea khwine nga ḽa Tony Mactony, u ḓovha ana mushumo wau nea vhathu vhane vha tama uvha vhatambi vha matambwa tshikhala khazwa mathambwa. Mushumo uyu uḓo farelwa Thohoyanḓou Sports Centre.
Ndivho ya mushumo uyu ndi u ṱanganya vhatambi vha vunḓu ḽa Limpopo na vhanwe vhatambi vhane vho no ḓi sikela madzina kha nḓowetshumo ya vhumvumvusi, vhagudisi na vhalanguli vha matambwa uya ngau fhambana.
Mutambi Tony, ane abva Makwarela ono tamba matambwa manzhi u katela Muvhango (SABC 2), The Estate (SABC 3) na Giyani: Land of Blood (SABC 2), hone zwa zwino u kha ḽitambwa ḽa The Black Door (e.tv). Sa izwi Tony asi mutambi fhedzi, u dovha hafhu avha ramuzika ane a ḓivhea hone o novha na tshenzhemo kha nḓowetshumo nnzhi sa uvha ramafhungo na mubveledzi wau ola. Tony ndi mutumbuli wa MAC97 Media.
Ndivho yawe khulwane kha mushumo une a ḓou fara Thohoyanḓou ndi u vhona vhaswa vha tshi gudiswa uvha vhatambi vha khwine kha nḓowetshumo ya vhumvumvusi. "Vhathu vhanzhi vha tama uḓi wana vha vhatambi makone, fhedzi uvha na vhumatshelo havhuḓi kha nḓowetshumo ya filimu na theḽevishini zwi ṱoḓa muthu ane ha touvha mutambi wavhuḓi fhedzi, u fanela uvha na zwikili."
Tony uri ua vhona uri vhunzhi ha vhathu vhaa tama u ḓi wana vha kha nḓowetshumo ya vhumvumvusi fhedzi vha shaya ndivho yo fanelaho. "Ndi ḓo ḓisa na vhatambi vha ḓivheaho, unga Zonke Mcunu ane avha Imani kha ḽitambwa ḽa Muvhango na Carol Netshingulu, ane avha Shumi kha ḽitambwa ḽa Muvhango.
Vhane vha ḓo thusa u topola vhare na vhukoni sa izwi navho vha vhatambi vhare na nḓivho na tshenzhemo. Ndi ṱoḓa uri vha ḓifulufhele, vha gude nḓila dza u kunda kha dzi ndingo dza uvha vhatambi, na nḓila dzau sumbedzisa vhuḓipfi nga nḓila ya vhutsila. Mushumo uyu u dovha hafhu wavha wau vha thusa u ṱanganya na vhanwe vhatambi, vhabveledzi na vhalanguli sa vho makone. Ndi fulufhela uri mushumo uyu ndi mathomo kha u fhaṱa vhumatshelo ha vhaswa vhanzhi vhane vha tama uvha vhatambi nau aluwa kha nḓowetshumo ya vhumvumvusi," a amba.