Tshiṱori nga: Bernard Chiguvare. Ṱhalutshedzo nga: Khathutshelo Raliphaswa.
Ngau ṱoḓa uvha ipfi ḽa tshitshavha, vhadzulapo vha fumbili u bva kusini kwa Tshakhuma vho farana zwanḓa uri vha vhumbe tshiṱitshi tshavho tsha khasho ya tshitshavha kusini uko.
Naho vhadzulapo vha Tshakhuma vha tshi kona u thetshelesa tshiṱitshi tsha Phalaphala FM, vha pfa uri vhunzhi ha zwine zwa bvelela kha kusi kwavho azwi vhigiwi lwo eḓanaho. "Ri ṱoḓa u ṋea vhadzulapo vha Tshakhuma tshikhala tshau pfiwa. Vhunzhi ha vhadzulapo vha lila nga nḓisedzo ya tshumelo hone na vharangaphanḓa vha kundelwa u davhidzana na vhadzulapo, ngazwo ri tshi khou ṱoḓa u ḓisa khasho kha vhadzulapo vha Tshakhuma. Huna vhanzhi vhane vha na vhukoni, ri takalela uri vha sumbedzise zwine vhakona na tsila havho. Vhaaluwa navho vha ḓo kona u laya, u eletshedza nau vhudza vhaswa nga ḓivhazwakale zwa kusi kwashu. Vhashumela tshitshavha vha SAPS vha ḓo kona u vhigela vhathu nga ha vhugevhenga vhune ha khou itea na vhoramabindu vha ḓo kona u anḓadza mabindu kana zwibveledzwa zwavho," hu amba muṅwaleli wa tshiṱitshi, Vho-Joel Mulaudzi.
Tshiṱitshi tsha khasho iyi ya Tshakhuma tsho no ṅwaliswa kha muhasho wa mveledziso ya vhudavhidzani, fhedzi zwa zwino vho lindela u ṅwaliswa na vha Mulayo wa vhudavhidzani hoḓi imisaho nga hoṱhe ya Afrika Tshipembe (ICASA). "Ro lindela uri vha ICASA vha vule uḓi ṅwalisa. U vula havho, rine ri ḓoḓi ṅwalisa uri ri wana nomboro yashu yau hasha khayo," Vho-Mulaudzi vha amba.
Zwa zwino, tshiṱitshi tshashu tshi bveledzwa kha ḽinki ya (https://tshakhumacommuityradiostation.co.za), hune ra tamba muzika nga masiari. Vhege yo fhelaho ro thoma mbekanyamushumo ine ya tamba ubva kha awara ya vhusumbe u swika awara ya vhuṱahe.
Kha vhege yau thoma ya ṅwedzi wa Fulwana, miraḓo ya Tshakhuma radio vha ḓo shumela kha tshifhaṱo tsha TD NewLook, kha gondo ḽa R524 Tshakhuma. Fhedzi, vha khou ṱoḓa zwishumiswa u fana na maṱafula a khudzaipfi, zwipikara zwa nnḓu dza khasho na zwinwe zwishumiswa zwa radioni. Ane anga kona u thusa anga kwama Vho-Mulaudzi kha nomboro dza 066 285 1181 kana 071 358 7421.
Vha nga dalela siaṱari ḽavho (Tshakhuma Community Radio Station), kana kha Instagram @tshakhumacommunityradio.