Tshiṱori nga Elmon Tshikhudo. Ṱhalutshedzo nga Khathutshelo Raliphaswa.
Muṅwe wa vhalanguli vha khwinesa vha shango na vhagudi, Vho Dokotela Reginald Lufuno Kone, vho lovha nga ḽa 7 Lambamai. Vhovha vhe na minwaha ya fumbili-malo, nga tshifhinga tshau fhira havho fhano shangoni vhovha vha tshi khou dzula Thohoyandou, vho lovha nga murahu ha musi vho valelwa vhuongeloni nga vhulwadze vhu songo ḓivhadziwaho. Vhovha vho no vha na tshifhinga tshilapfu vhe vhuongeloni.
Muambeli wa muta Vho Mulalo Masisi vho khwathisedza lufu lwavho. Vho amba uri Vho Dokotela Kone vho shuma kha sekhithara dzo fhambanaho, hu tshi katelwa na muvhuso na kha Exxaro Mine ngei Tshikondeni. Vho vha vha tshi dovha vha vha mudededzi muhulwane kha Yunivesithi ya Venda nahone zwenezwino vho shuma sa mudzulatshidulo wa khoro ngei Lephalale TVET College.
Vhovha vha tshi khoḓiwa sa tshipiḓa tshihulwane tsha zwa pfunzo. Kha ṱhanziela dzavho nnzhi ho vha hu na vhudokotela vhuvhili - vhuṅwe kha pfunzo u bva kha Univen na vhuṅwe kha ndaulo ya tshitshavha u bva Yunivesithi ya Fort Hare. Vho lovha vha sa athu fhedza PhD ya vhuraru, kha saintsi ya vhudavhidzani, nga kha Yunivesithi ya Muvhuso ya Midlands ngei Zimbabwe.
Nga u ṱavhanya musi mafhungo a u fhira havho a tshi bvelela, milaedza ya ndiliso yo shuluwa u bva kha kotara dzo fhamba-fhambanaho. Tshiṅwe tsha zwiimiswa zwe zwa livhisa maipfi a ndiliso ndi University ya Venda, he vha shuma sa mudededzi na muraḓo wa khoro. Kha tshitatamennde, muambeli wa yunivesithi Vho Dokotela Takalani Dzaga vho sumbedza u ṱungufhala ha gudedzi. Vho amba uri Vho Dokotela Kone vho shuma sa mulanguli wa Mutheo wa Univen wa tshenetsho tshifhinga.
"Dr Kone vho vha vhe murangaphanḓa o ḓiimiselaho nahone vhe muimeleli a re na lufuno wa pfunzo na thikhedzo ya matshudeni. Miṋeelo yavho kha Yunivesithi ya Venda na tshitshavha nga u angaredza yo vha i khulwane, nahone u ḓikumedzela havho kha u thusa matshudeni u swikelela zwipikwa zwavho zwi ḓo humbulwa nga lufuno," vho ralo.
Mulanguli wa Khoḽedzhi ya TVET ya Lephalale Vho Vicent Ngobeni vho ṱalusa lufu lwa Vho Dokotela Kone sa u xelelwa huhulwane kha khoḽedzhi na shango. "Dr Kone vho tholiwa zwenezwino sa mudzulatshidulo wa khoro ya gudedzi lwa tshifhinga tshe tsha thoma nga Ṱhangule 2024. Nga phanḓa ha hezwi, vho shuma kha khoro kha mishumo yo vhalaho," vho ralo.
Muambeli wa muṱa Vho Mulalo Masisi vho ṱalusa Vho Dokotela Kone sa khamphani khulwane ya zwa pfunzo. "Ri khou ṱungufhala sa muṱa. Ho vha hu u funa zwithu zwoṱhe kha muṱa. Vhovha vha tshi ri funa roṱhe nahone vho vha vhe muthu wa mafunda vhe vha dzhenelela kha zwitenwa zwinzhi, vha tshi ṋea vha shayaho. Vhovha vha tshi funa pfunzo yavho, nahone ro vha ri tshi vha vhidza nga lufuno 'Doctor Squared' sa izwi vhovha vhe na vhudokotela vhuvhili," vha ralo.
Mushumo wa tshihumbudzo u ḓo farwa u itela u vha hulisa Holoni ya Multipurpose / Khathedara ya Kereke ya Lutheran nga Ḽavhuṱanu, ḽa 18 Halambamai, u thoma nga 13:30. Musumbuluwo wa mbulungo u ḓo vha hone kerekeni ya Thohoyandou Lutheran nga 07:00.