Tshiṱori nga Silas Nduvheni. Ṱhalutshedzo nga Khathutshelo Raliphaswa.
Vhagudi na vhadededzi vha tshikolo tsha sekondari ya Muvhavha kha muvhundu wa Tswinga, nnda nyana ha ḓorobo ya Thohoyandou, vha na fulufhelo la uri thandululo ye ya vha yo lindelwa lwa tshifhinga tshilapfu malugana na khaedu ya u ḓala ha vhagudiswa tshikoloni tshavho i khou fhedzisela i nḓilani.
Nga Ḽavhuṱanu ḽa vhege yo fhiraho, tshigwada tshi bvaho kha Muhasho wa Pfunzo wa Limpopo tsho dalela tshikolo itsho u itela u dzhia mielo. Mudzulatshidulo wa khorombusi ya tshikoloni itshi, Vho Thomas Mudzusi, vha ri vha na fulufhelo ḽa uri mushumo wa u thoma phera dzau gudela tharu dzi tshimbilaho zwino u ḓo thoma.
Uya nga ha Vho Mudzusi, tshikolo tsho livhana na ṱhahelelo khulwane ya phera dzau gudela, zwa kombetshedza vhagudiswa vha Gireidi ya 10, 11, na 12 vha tshi khou guda mbalo na saintsi uri vha vhe na ngudo dzavho nnḓa fhasi ha miri nga zwiṅwe zwifhinga. Vhuimo ho ṋaṋiswa nga mvula i sa fheli u bva mathomoni a ṅwaha, zwe nga zwiṅwe zwifhinga zwa ita uri zwi sa konadzei u ita ngudo. Vho Mudzusi vhari fhungo iḽi ḽo vhigwa kha muhasho lwo vhalaho.
Vha ḽihoro ḽa Democratic Alliance (DA) vha Limpopo na vhone vho ṅwalela MEC wa muhasho wa zwa pfunzo Vho Mavhungu Lerule-Ramakhanya, vha tshi khou ita khuwelelo ya u dzhenelela nga u ṱavhanya. Mudzulatshidulo wa DA wa vunḓu Vho Jacques Smalle vho gungula uri tshikolo tshi na vhagudi vha fhiraho 600, fhedzi tshi shaya kilasi dzo eḓanaho u itela u vha ṱanganedza.
Vho Mike Maringa, muambeli wa Muhasho wa Pfunzo wa vunḓu Limpopo, vho khwathisedza uri vha a ḓivha fhungo iḽi na uri vho renga dzi kilasikhwalwa dza tshikolo tsha Muvhavha. Naho zwo ralo, vho amba uri, kilasirumu idzi dzo vha dzi tshi fanela u livhiswa hafhu kha zwiṅwe zwikolo zwo kwameaho nga u tshinyadzwa ha ḓumbu kha dzingu.
Vho Maringa vho bvisela khagala uri ndi kilasi dza mbalo na saintsi fhedzi dze dza kwamea nga u shaya tshikhala, nahone na nga murahu ha zwenezwo, nga zwifhinga zwo fhambanaho fhedzi zwine kilasi dza ṱoḓa u kovhelwa. Vho sumbedza u vha na fulufhelo kha uri Tshikolo tsha Sekondari tsha Muvhavha tshi do wana dzi kilasikhwalwa hu si kale.