Tshiṱori nga Silas Nduvheni. Ṱhalutshedzo nga Khathutshelo Raliphaswa.
Fulo ḽau ṱoḓa vhavhingani vho ngalangalaho, vhe vha vha vha tshi bva muvhunduni wa Hamabila tsini na Nagavhani kha vhupo ha Mutale, zwo fhela vhege yo fhiraho musi tshitumbu tsha mufumakadzi tshi tshi wanala kha vunḓu ḽa Free State. Mufunwa wa mufumakadzi o ḓou farwa nga murahu ha u ḓiṋekedza kha mapholisa ngei Musina nga Ḽavhuṱanu, ḽa 24 Phando.
Dakalo Nemangwele (34) na Mudzunga Ramalata (29) vho ngalangala vhege mbili dzo fhiraho, zwe zwa ita uri hu vhe na fulo ḽau vha ṱoḓa u mona na shango lothe. Naho vho vha vho no vhuya vha dzula Hamabila, vho vha vho no pfulutshela kha vunḓu ḽa Gauteng. Vho vhigwa vho ngalangala kha SAPS ya Moroka ngei Soweto nga ḽa 17 Phando ṅwaha uno.
Mapholisa vho thoma vha sa pfesesa zwavhuḓi musi munna a tshi vhudza vhaṱoḓisisi uri Nemangwele o hadzima tshelede khae na uri zwi vhonala uri vhavhingani vho dzudzanya u pfuka vha dzhena Zimbabwe uya u awela vha rwiwa nga muya.
Uya nga muambeli wa mapholisa wa Limpopo Vho Col Malesela Ledwaba, ṱhoḓisiso dzo engedzeaho dzo bvisela khagala uri mafhungo aya ndi a si ngoho. Mapholisa vho mbo di thoma u humbulela uri mukalaha wa minwaha ya 34, we nga murahu wa ditiwa nga Tshilisanani Mboweni, o vha a tshi khou ita tshimbevha na Nemangwele uri mufumakadzi wawe o fhirisiwe fhano shangoni.
U bvelela ho ḓa musi muhumbulelwa, Evans Mundalamo (24), a tshi farwa nga Ḽavhuraru, ḽa 22 Phando, hune Phando a dzula hone kha vhupo ha zwa vhupholisa ha Tshamutumbu. "O wanala e na zwihali zwivhili zwi si na ḽaisentsi, u katela na tshigidi tsha u zwima tshi re na zwihali. Muhumbulelwa o ḓivhonadza phanḓa ha Khothe ya Madzhisiṱaraṱa ya Musina nga Ḽavhuṱanu, ḽa 24 Phando," Vho Ledwaba vho ralo.
Nga Ḽavhuraru (22), nga iri ya 11:00 maṱavhelo, tshitumbu tsha Mudzunga Ramalata tsho wanala tshi na zwilonda zwinzhi zwa u thuntshiwa ḓakani tsini na N1 tsini na Kromdraai ngei kha vunḓu ḽa Free State.
Nga masiari a lavhutanu lavhutanu, Dakalo Nemangwele o ḓou di nekedza mapholisa ngei Musina. O vha o hweswa mulandu wa u vhulaha, khathihi na Tshilisanani Mboweni, vhe mapholisa vha tenda uri mathomoni vho lingedza u laṱa vhuṱala.
Khomishinari wa mapholisa wa vunḓu Limpopo, Vho Lt-Gen Thembi Hadebe, vho ṱanganedza u farwa ha vhathu na u khoḓa vhoṱhe vho dzhenelelaho kha ṱhoḓisiso ya nga vhuronwane. Vho dovha vha livhuwa tshitshavha nga u ṋetshedza mafhungo a ndeme e a thusa kha u farwa nga u ṱavhanya ha vhahumbulelwa.
Vhahumbulelwa vhavhili, Nemangwele na Mboweni, vho ḓivhonadza nga u tou pfufhifhadza khothe ya madzhisiṱaraṱa wa Free State nga Musumbuluwo, ḽa 27 Phando. Mulandu wavho wo fhiriselwa phanḓa nga ḽa 3 Luhuhi u itela khumbelo ya beili ya tshiofisi.
Miraḓo ya muṱa ya mufumakadzi uyo o lovhaho yo vhona mulandu wa u vhulaha khakhathi dza miḓini, vha tshi amba uri vhenevho vhavhingani vho vha vha tshi khou dzulela u lwa lwa tshifhinganyana. Murathu muhulwane wa Mudzunga, Vho Dokotela Khathutshelo Ramalata, vho amba uri vho mu kaidza uri a bve kha vhushaka ha u tambudza, fhedzi a nga si thetshelese.
"Ndi tenda uri khaladzi anga o vhulahwa kha zwine zwa nga ṱaluswa fhedzi sa vhutshinyi ho dzudzanywaho hu tshee nga phanḓa, sa izwi vho vha vho no fhandekana nahone vha sa tsha dzula vhoṱhe. Muthannga wawe o vha e na vivho ḽihulwane nahone o vha o dzudzanya u mu vhulaha," o ralo. "Riṋe sa muṱa ro vhaisala vhukuma, fhedzi ri fulufhela uri mapholisa vha ḓo ita mushumo wavho na u khwaṱhisedza khaṱulokwayo kha ṅwana washu. A hu na muthu o fanelwaho nga u vhulahwa nga u ralo," Vho Dokotela Ramalata vho engedza.