Tshiṱori nga Elmon Tshikhudo. Ṱhalutshedzo nga Khathutshelo Raliphaswa.
Ḓorobo ya Ṱhohoyanḓou, zwihulu bada khulwane ya ubva posoni khulwani yavhupo uho uya hau ima zwiendedzi ha Venda Plaza, hu khou anda uvha tshivhilelani tsha mavemu.
Ubva miṅwedzi yo fhiraho, zwiwo zwire na tshivhalo hu tshi katelwa u ṱangula, u ṱhavhiwa havhathu vhahuvhadzwa, na zwiṅwe zwovha zwi tshi khou itea hanefho fhethu. Mafhelo a ino vhege o fhiraho, munna o lozwa vhutshilo hawe ngau ṱhavhiwa a tshi khou tshimbila kha bada iyo khulwane
Tshiwo itsho tsho itea nga madekwana a Mugivhela a awara ya vhusumbe, fhethu hune ho tou livhanywa na vhengele ḽa Boxer tsini na rinngi ya Venda Plaza. Uya nga zwine zwa khou pfala, munna uyo ane hapfi ndi muthu ane a bva kha ḽavhahura Zimbabwe, ovha a tshi khou tshimbila e eṱhe musi a tshi tevhelwa nga vhaṅwe vhanna vha tshi lingedza u mu homboka. Nga tshifhinga tsha musi vha tshi lingedza umu homboka, o lingedza u ḓi lamulela, fhedzi vha mu ṱhavha lwa tshivhalo vha mu sia o lovha. Tshitumbu tshawe ndi tshe tsha wanala tshi kha tivha ḽa malofha hanefho tshiṱaraṱani.
Muṅwe mupondiwa vha mufumakadzi , vhe vha hana u buliwa dzina, vho amba zwauri vhovha vha tshi khou bva kha vhengele ḽa tsini musi vha tshi vhona vhanna vha tshigwada vho tingeledza muṅwe munna. "Ndo ḓou zwi pfa uri hu na zwithu zwine azwi khou tshimbila zwavhuḓi zwine zwa khou itea, ndi he nda ḓou dzhia iṅwe nḓila ya ubva ngayo. Fhedzi a zwingo thuso ngauri ndo ḓou ṱangulwa bege yanga nga vhanna vhavhili ndi sa vha ḓivhi. Muṅwe wavho o ḓou kombetshedza uri ndi ṱuwe nae banngani, mashudu mavhuya nda lamuleliwa nga mureili wa tshiendedzi. Ndi ngazwo o ḓou nnditsha, nda kona u huwelela ndi tshi ṱoḓa thuso, vhanna avho vha ḓou shavha na zwenezwo," vha amba.
Vho amba zwauri ho touvha nga murahu ha tshifhinga he vha konou zwi limuwa zwauri hu na Munna o vhulawaho. "Ahungo tshi tsireledzea hafha Ṱhohoyanḓou nga madekwana. Ḓorobo ivha i na swiswi ḽihulu ng madekwana, hone husina na mapholisa vhane vhavha vha tshi khou shuma, zwihulu nauri tshiṱitshi tsha mapholisa atshiho kule na bada iyi. Ri touvha zwanḓani zwa mavemu ngoho," vha amba.
Vhashumi vhau rengisa afho badani vhari vho no tou neta ngau vhona zwiito izwi zwi tshi itea sa izwi zwo novha zwa ḓuvha na ḓuvha kha vhupo uho. Munwe wa vharengisi vho amba zwauri: "Ri zwi vhona ḓuvha ḽiṅwe na ḽiṅwe hezwi. Ri dzulela upfa vhathu vha tshi khou huwelela vha tshi ṱoḓa thuso musi vha tshi khou hombokiwa. Zwine zwa vhavha ndiuri hu vhonala hu vhugevhenga ho tou dzudzanyiwaho uri hu gevhengiwe vhathu vhane vha vala vhusiku mishumoni yavho. Ri khou isa tshililo na khumbelo kha mapholisa uri vha engedza vhashumi vhone vhavha vha tshi khou shuma hafha, uri zwiwo zwau lozweaho ha matshilo a vhathu zwi fhungudzee."
Muambeli wa mapholisa kha tshiṱiriki tsha Vhembe W/O Vuledzani Dathi vho khwathisedza tshiwo, vha amba zwauri ho vuliwa na mulandu wa bulayo. "Ro vhidziwa he tshiwo tsha itea hone, ra ri ri tshi swika ra wana munna o edela kha tivha la malofha. Munna uyo ovha e na mukhwama u na masheleni a paḓaho maḓana a rathi. Bugu ndaula yawe ya passport yo ḓou zwi bveledza zwauri ndi munna a bvaho kha ḽa Zimbabwe hone e wa minwaha ya fumbili-rathi. Ri khou ita khuwelelo kha vhadzulapo uri vha thuse nga zwine zwa nga thusa uri hu fariwe vhahumbulelwa kha mulandu uyu. Vha nga isa muvhigo kha muofisiri wa ṱhoḓisiso Detective Constable Pleasure Mabasa kha 083 981 2202" vha amba.