Nga murahu ha minwaha i fhiraho ya fumi a kha nḓowetshumo ya muzika, Tsiko Trevor Malindi u ḓo kandisa muzika wawe wau thoma u tshio vhoniwa nga vhathu nga dzi 28 Lambamai. U kandisa aḽibamu iyi na vhatevheli vhawe ndi nḓila yawe ya u davhidzana na uḓi ṱumanya na vhatevheli vhawe vhane vha mu takelela u mona na shango.
Tsiko Mal sa zwine a ḓivhea kha nḓowetshumo ya muzika o bebwa Makonde kusini kwa nnḓa ha Ṱhohoyanḓou. Sa muswuhana o aluswaho muṱani wa vhatendi he malume awe vhovha vha murangaphanḓa wa kereke kha kusi konoko, ndi he avha na dzangalelo ḽa muzika a tshi imba kha khwairi ya kerekeni a na minwaha ya fumi mbili.
Ene uri dzi alibamu dzawe dzo fhiraho dzo rikhodiwa nḓuni dza u rikhoda muzika fhedzi zwa zwino u ṱoḓa uri vhatevheli vhawe vhavhe hone kha alibamu iyi.
Nga ṅwaha wa gidi mbili fumiraru o bvisa aḽibamu yawe yau thoma, Here I am, ye ya tevhelwa nga aḽibamu ya Goodness and Mercy nga ṅwaha wa gidi mbili fumisumbe. Nga ṅwaha wa gidi mbili fumbilinthihi o bvisa nyimbo nthihi Goliada, ye ya takalelwa nga vhatevheli vhawe. Nyimbo yawe nthihi ya 1 John 4:4 ya ṅwaha wo fhelaho yovha yone nyimbo yawe ya u fhedzisela a saathu rikhoda aḽibamu iyi ine ya khou tevhela.
Tsiko Mal ndi muimbi ane ono ḓi endela vhupo vhunzhi nga muzika hone ono ḓi wana a khou imba na vhaimbi vha ḓivheaho vhukuma kha nḓowetshumo ya muzika fhano Afrika Tshipemebe.
Nga ha aḽibamu yawe, Tsiko Mal uri: "Musi u nḓuni dzau rikhoda, u vha na vhuṱumanyi na bennde yau na vhane vha bveledza muzika fhedzi. Ndo vhona uri vhathu vha takalela muzika wanga, nda humbula uri u rikhoda fhethu huthihi navho ndi nḓila ya khwine ya uvha livhuwa kha u ntikedza havho,".
Aḽibamu iyi i ḓo rikhodwa kerekeni ya Disciples Christian Worship Centre, Mbaleni. Nzudzanyo dzoṱhe dzo no fhela, mushumo wo lavhelelwa u thoma nga iri ya vhuṱanu mathabama.
U wana zwinzhi nga huḓalo vha kwama Tsiko kha 071 623 4297.