Tshiṱori nga: Thembi Siaga. Ṱhalutshedzo nga: Khathutshelo Raliphaswa.
Vhadzulapo vha Ha-Malamulele vha na pfanelo dzoṱhe uri vha vhilaele nga ha tsireledze yavho nga murahu ha u ṱangulwa ha butshara ya OBC ire kha mavhengele tserekano a Masingita, tsini na tshiṱitshi tsha mapholisa tsha Malamulele. Izwo zwo itea nga matsheloni a Lavhuṱanu ḽa iṋa Thangule, nga awara ya vhumalo.
Mulindi wa tsireledzo wa Fidelity Cash Solutions o hombokwa a khou bannga masheleni kha mutshini wa masheleni (ATM) musi hu tshi swika vhanna vha rathi vho ḓi ṱama nga zwigidi. Vhanna avho vho dzhia masheleni a songo bulwaho a tshivhalo nga khani kha mulindi wa tsireledzo uyo.
Muambeli wa Mapholisa(SAPS), sedzheni Vho-Busisiwe Khuzwayo, vhari ho tswiwan tshigidi tshire na gulu dza khamphani ya vhulindi. "Vhahumbulelwa vho thuntsha lwa tshivhalo vha saathu u ṱuwa nga moḓoro mutshena wa NP 300. Ahuna u huvhala ho khwaṱhisedzwaho kha tshiwo itshi. Zwa zwino ri khou zwimana na vhahumbulelwa vhe vha ṱangula butshara iyo vhane a vha ḓivhei zwa zwino," hu amba Vho-Khuzwayo.
Mudzulapo wa kusi kwa Mapapila ngei Ha-Malamulele, Freedom Chavani, o ṱahisa mbilaelo dza vhadzulapo nga ha tsireledzo yavho. "Ri pfa ri songo tsireledzea ngauri mavemu vha khou tshinya tsini na tshiṱitshi tsha mapholisa vhane vha fanela u ri tsireledza. Ri vhea hani fulufhelo ḽashu kha mapholisa ngeno mavemu a tshi kona u ṱangula tsini navho? Zwi vhilaedzisaho zwihulu ndi u ṱangulwa ha tshiṱitshi itsho minwaha mivhili yo fhiraho," a engedza.
Vho-Khuzwayo vhari hu ḓo dzhiiwa maga o teaho u nea vhadzulapo fulufhelo uri vha tshe vho tsireledzea vhoṱhe nga u angaredza. "Ri ṱoḓa u engedza tshumelo ya u tsireledza vhadzulapo. Hu na vhaofisiri vho engedzwaho vhane vha khou linda uri vhadzulapo vha pfe vho tsireledzea," vha amba.
Muambeli wa vha vhulangi ha tsedzuluso ya vhugevhenga vunḓuni ḽa Limpopo, vho kholonele Vho-Matimba Maluleke, vho khwaṱhisedza uri ho vulwa mulandu wa u zwimana na vhahumbulelwa.
Ane anga thusa mapholisa kha u farwa ha vhahumbulelwa avha anga kwama mukhapuṱeni Vho-George Mutavhatsini kha 071 351 7275, vhaya kha tshiṱitshi tshire tsini navho, vha rumela muvhigo kha nomboro ya lushaka ya 08600 10111 kana vha shumisa epe ya MysapsApp.