Tshiṱori nga: Silas Nduvheni. Ṱhalutshedzo nga: Khathutshelo Raliphaswa.
Vhadzulapo vha Ha-Makhuvha tsini na Vhufuli vha ḓo awela u shumisa gondo ḽire na buse na thophe musi mvula i tshi na. Izwi ndi ngauri hu khou fhaṱwa bada ya khwine ya khiḽomitha dza malo.
Ha-Makhuvha hu wela fhasi ha Masipala wa Thulamela, hone khonṱiraka yo ṋewa vha Tainama Civils (Pty) Ltd ubva Bulugwane.
Neḓorobo ya Thulamela, Vho-Athingozwidivha Sarah Rammbuda, vhofhelekedzwa nga vhanwe vha vhakhantselara vhavho, vhaofisiri na vhanwe vha vharangaphanḓa vha Vhufuli na Ha-Makhuvha, vho rwela ṱari u thomiwa ha mushumo uyu wa masheleni a rannda dza milioni dza fuṱahe-mbili nga Ḽavhuvhili ḽa fumi raru Fulwi.
Vhamusanda vha kusi uku, Vhamusanda Vho-Ntakadzeni Makhuvha, vhari vhadzulapo vha kusi kwavho vhovha vhe na dzi mbilaelo nga ha gondo iḽo ḽau livha kusini kwavho, he kha munwe wa miṱangano yavho na vhadzulapo, vha dzhia tsheo yau isa mbilaelo dzavho na khumbelo yau ṋeiwa gondo ḽa khwine kha muṱangano wa masipala wa IDP.
"Ro takala sa izwi u fhaṱwa ha gondo ho no thoma, hone ri huwelela vha komiti uri vha shume zwavhuḓi na vhafhaṱi vha gondo. Ri dovha hafhu ra fulufhela uri vhunzhi ha vhadzulapo vha ḓo wana mishumo ya tshifhinga tshiṱuku musi hu tshi khou fhaṱwa gondo iḽi," vha amba.
Vho-Rammbuda vhari vho ḓi lugisela u isa tshumelo nga tshihaḓu kha vhadzulapo, zwihulu tshumelo ya gondo ḽa khwine nau isa muḓagasi miḓini. "Mushumo uyu wau fhaṱa gondo ḽa khiḽomitha dza malo ndi tsumbo uri masipala vhoḓi imisela u ṋea vhathu themamveledziso ya khwine. Vha lavhelela uri mushumo uyo u fhela nga minwedzi ya fumi malo, hone arali vhadzulapo vha shuma zwavhuḓi na vhafhaṱi vhatshivhanetshedza thikhedzo vha nga fhedza minwedzi iyo tetshelwaho i saathu u fhela," Vho-Rammbuda vha amba.