Ṱhalutshedzo Khathutshelo Raliphaswa.
Vhafuni vha muzika wa Zionist (drum), wo ṱanganedzwa nga nḓila i ofhisaho. Hezwi zwi tevhela u fhira fhano shangoni ha muṅwe wanambi ya muzika wa sialala na wa shango vhane vha ranga phanḓa, Aubrey Tshimangadzo Rambuwani.
Aubrey we avha e na minwaha ya 37, we avha a tshi bva Harabali ngei Nzhelele, o vha a tshi dzula Palm Ridge, Gauteng, nga tshifhinga tsha lufu lwawe. Ovha e muraḓo o khwaṱhaho wa Kereke ya Vhuapositola ya United African (UAAC). O lovha nga Swondaha, nga ḽa 25 Shundunthule, nga murahu ha u farwa nga vhulwadze vhu sa ḓivhei.
Aubrey ndi ene muimbi wa vhuvhili wa gospel wa vhuimo ha nṱha u lovha Vhembe vhege dzo fhiraho. Vhege yo fhelaho, nḓowetshumo ya muzika na shango vho tshuwiswa nga u fhira ha muṅwe mutsila a ḓivheaho wa zwa mafhungo-maḓifha, Phumudzo Nkhetheni Bisha, khwine ovha a tshi divhea sa Vhabisha, mutsila a bvaho Khubvi, nnda ha Thohoyandou, ane o fhelekedzwa vhuaweloni hawe hau fhedza mafheloni a vhege.
Aubrey o ḓi sikela dzina lawe lo khetheaho na u kunga vhathu nga nḓila dza khwine. O vha a tshi tikedza u shumiswa ha mirumba ya sialala kha zwilidzo zwa musalauno kha muzika wawe. O bvisa nyimbo nnzhi, fhedzi nga 2023 Khahule ndi yone ye ya vha i tshi khou mu ṱuṱuwedza uri a vhe na bvumo.
Khonani ya tsini, Awelani Makongoza, vha ri vho divha Aubrey khwine nga 2013 musi hu tshi khou thomiwa aḽibamu ya Vhaapostola Tshiawelo, Gauteng. "U fhira ha Rambuwani a si u vhaisala ha muṱa wawe fhedzi, fhedzi na kha vhaimbi vhe vha vha vha tshi khou shuma nae. O vha e munna wa dakalo ane u vha hone hawe ha pfala fhethu hoṱhe.
Murathu wawe, Meshack, o amba uri muṱa wo vha wo vhaisala. "Aubrey o vha e phuphu yashu ya maanḓa na tshedza tshi penyaho muṱani. O vha e muthu a ḓiṱukufhadzaho wa Mudzimu a re na mbilu yavhuḓi we a vha a tshi funa muzika wawe wa mafhungo madifha na kerekeni. Ndi muthu ane ra ḓo mu elelwa vhukuma,"a amba.
Mushumo wa tshihumbudzo u itela u mu hulisa u ḓo farwa nga Ḽavhuṱanu, ḽa 30 Shundunthule, Kerekeni ya Vhuvusuludzi ha Vhukriste (CRC) tsini na U-Save ngei Rabali, u thoma nga 11:00. Mushumo wa mbulungo u ḓo vha hone nga Mugivhela, ḽa 31 Shundunthule, hayani hawe, u thoma nga awara ya 06:00.