Tshiṱori nga: Entrepreneurs. Ṱhalutshedzo nga: Khathutshelo Raliphaswa.
Ndifelani Nemaungani wa u bva kha kusi kwa Shanzha u touvha ṱhanzi uri arali u tshi kona u shumisa masheleni nga nḓila ya khwine, ua kona uvha na zwinzhi vhutshiloni. Vho-Nemaungani vha minwaha ya fuina malo, vha na minwaha i fhiraho ya furaru vha tshi shuma u runga zwienda kha gondo ḽa Phadzima. Nga masheleni ane vha kuvhangana ngau runga zwienda, vho no kona u fhaṱa nnḓu ya phera ṱhanu, u renga goloi nau swikelela mutshato wa maimo vha tshi mala mufumakadzi wavho Vho- Shonisani.
Ngau runga zwienda, Vho-Nemaungani vha ṱhogomela mufumakadzi wavho na vhana vhavho vhararu, vho no kona hafhu u vhulunga masheleni uri vha gudele zwa vhulangi ha nyambedzano, vhulangi ha mabindu na vhulangi ha mishumo.
Vho-Nemaungani vhari avha tendelani na vhathu vhane vhari Afrika Tshipembe ahuna mishumo. "Uya nga nne, mishumo i hone kha shango ḽashu. Zwa vhuṱhogwa ndi uri muthu a sedze thungo dzoṱhe nauri aḓi thomele mushumo ure na ngoho khawo. Thi athu vhuya nda ṱoḓa mushumo vhutshiloni hanga, ndi tenda khau ḓi imisa nne mune, zwihulu kha zwifhinga zwikonḓaho ngau rali. Ndi ṱuṱuwedza vhadzulapo vha Afrika Tshipembe uri vha ḓi sikele mishumo ngauri muvhuso na mabindu avha sikeli vhathu vhoṱhe mishumo," vha amba.
Vho-Nemaungani vho thoma u runga zwienda vha na minwaha ya fumi rathi nga thuso ya Khathutshelo Dongola. "Ndi livhuwa ṱhama yanga ya kale, Khathutshelo Dongola, ea ngudisa u runga ri tshe vhagudiswa tshikoloni tsha nṱha. Ndovha ndi tshi runga zwienda zwa vhadededzi na vhagudiswa u swika kha murole wa vhufumi," vha engedza.
Vha tshi vhudziswa uri ndi ngani vha tshi isa phanḓa nau runga naho vho funzea lune vha tea u ṱoḓa mushumo une wa vha holela masheleni manzhi vhari: "Ndi ane ndavha ene namusi sa mvelele dzau shuma u runga zwienda, ndi dovha hafhu nda funa zwine nda ita ngauri ndi tenda uri Mudzimu vho nṋea zwikili zwau thusa vhathu uvha rungela zwienda. Athi ṱoḓi u ṱoḓa munwe mushumo wa zwe nda gudela, u runga zwienda ndi vhutshilo kha nne. Ndalukanyo dzanga dzo tou nthusa u ṱanḓavhudza nḓivho yanga kha masia o fhambanaho, ndi zwavhuḓi u guda nau ṱanḓavhudza nḓivho kha shango iḽi ḽi shandukaho ḓuvha na ḓuvha, fhedzi ndi ḓo bvela phanḓa nau ita zwine nda zwi funa."