Tshiṱori nga: Bernard Chiguvare. Ṱhalutshedzo nga: Khathutshelo Raliphaswa.
Makete muswa wa vharengisi vha tshitandani ure vhukati ha tshitarata tsha Burger na tsha Kruger wo vulwa, vhunzhi ha vharengisi vho no fhedza u dzudzanya zwipiḓa zwavho zwau rengisela.
Vharengisi vhari makete uyu muswa u khwine ngau kuna kha makete we vhavha vha tshi rengisa khawo zwiliwa, mitshelo na miroho kale. Kha makete uyu, vharengisi vhaa kona u sia zwirengiswa zwavho nga ngomu vha tshi tshaisa li tshi kovhela. Vha dovha hafhu vhavha na maḓi tsini na makete, kha makete wa kale vhovha vha tshi tou atevhela maḓi fhethu hune ndi tsini na mabunga a nnyi na nnyi. Zwi takadzaho vharengisi nga makete uyu muswa, ndiuri ahuna buse lune naho mvula ya na, vharengi vha ḓo renga kha makete une ua tshimbilea hone ahuna thophe.
Uya nga muambeli wa Masipala wa Makhado, Vho-Louis Bobodi, vhari vharengisi vha swikaho fuṱahe vhaa kona u ḓadza makete uyu. "Vharengisi vha fanela u kulumaga nau ṱhogomela makete uyu vhone vhane, hone na u thela vha ḓo thela uya nga thendelano na Masipala."
Vho-Bobodi vhari mapholisa vha ḓo anzela u ṱola makete uyo u itela tsireledzo ya vharengisi na zwibveledzwa zwavho.
Nga Lavhuna ḽa fumithihi Shundunthule, vha Limpopo Mirror vhovha na nyambedzano na vharengisi uri vha ḓipfa hani nga u shuma kha makete muswa.
Hulisani Mabasa wa minwaha ya fumbili rathi, ane a rengisa maṱamatisi, uri u takalela uri vho ṋeiwa makete muhulwane hone u fulufhela uri u ḓo wana vharengi nga vhunzhi sa izwi vhathu vha tshi takalela u renga zwiliwa fhethu ho kunaho. Mabasa uri o thoma u rengisa nga ṅwaha wa gidimbili fumbilithihi nga murahu nge makhulu awe vha awela sa izwi vha mualuwa vhane avha koni u ṱhogomela bindu.
"Ndo takala nga makete muswa, rina tshumela ya khwine ya maḓi, tshifhinga tsha murahu rovha ri tshi balelwa na uka maḓi sa izwi rovha ri tshi a tevhela kule. Ri dovha hafhu ra livhuwa uri zwa zwino ari tshimbili na zwibveledzwa zwashu ri tshi ya hayani," hu amba Grace Rabuli a bvaho Madombidzha, ane u bika nau rengisa kha makete uyu.
Mudzulatshidulo wa tshiimiswa tsha vharengisi ha mimakete ire Tshitandani, Vho-Micheal Phathela, vhari vho takala nga makete muswa, fhedzi vha pfa uri au koni u tendela vharengisi vhoṱhe sa izwi u tshi tendela vharengisi vha furathi vhane vha rengisa zwibveledzwa na vharengisi vha furaru vhane vha rengisa zwiliwa zwo bikwaho.