Tshiṱori nga: Elmon Tshikhudo. Ṱhalutshedzo nga: Khathutshelo Raliphaswa.
Nga matsheloni a Musumbuluwo wa ḽa fumiiṋa Ṱhangule, ho wa tshifhaṱo ḓoroboni ya Ṱhohoyandou zwe zwa sia vhunzhi ha vharengi na vhaoramabindu vha tshi vhilaela nga ha tsireledzo yavho na zwiimo zwa zwifhaṱo sa izwi itshi tshifhaṱo itsho tshi na minwaha minzhi tsho fhaṱiwa.
Tshifhaṱo tsha Rammbuda Complex, hune ha ḓivhea khwine nga Star Glass, tshire na minwaha ya fuina tsho fhaṱwa tsho wa hu sina tswayo dza uri tshi nga wa nga matsheloni, nga awara ya vhu ṱahe. Ho kwamea mishumo ya mabindu a tshivhalo tsini na tshifhaṱo itsho lwe mabindu ayo a ima mishumo ḓuvha ḽoṱhe. Vhoramabindu vha mabindu ayo vho sumbedzisa uvha vho kwamea nga nḓila isi yavhuḓi nga tshiwo itshi.
Nga u vhilaela na u ḓi vhudzisa uri ho bvelela mini he tshiwo tsha bvelela, vharengi na vharengisi vhovha vho ḓadza vhupo uho vha tshi lingedza u thusa na u sedzulusa arali huna vhathu vho welwaho. Vha tshumelo dza shishi vha fanaho na mapholisa, vha vhulangi ha khombo dza Vhembe, vha tshumelo dza mutakalo, na vhanwe vhafaramikovhe vho kona u langa he tshiwo tsha bvelela hone. Ho vhonala ho welwa mualuwa wa mufumakadzi nga zwidina, fhedzi vha hwalelwa vhuongeloni ha tsini hune vha khou ongiwa hone.
Uya nga ha ṱhanzi ye ya zwi vhona nga maṱo, Mkateko Mabasa, vhane vha rengisa zwiliwa tsini na tshifhaṱo tsha Star Glass vhari: "ndo takutshedza nda sia dennde ḽanga ḽi sina muthu nga u pfa muungo hu tshinga ho wa moḓoro, nda gidimela he tshiwo tsha bvelela hone uri ndi vhone uri mulandu ndi mini. Ndori u swika nda vha ndi khou vhona tshifhaṱo tshi tshi wa tsho livhana na nne, nda gidima ndi tshi phulusa vhutshilo hanga. Nga murahu nda vhona tshigwada tsha vhathu vha tshi gidima u bva mabuḓo a u fhambana. Ndi a thoma u vhona tshiwo tsha u rali, ndi tshe ndo tshuwa. Ndo tou vhaisala ndi tshi vhona mualuwa vha tshi thuswa vho welwa," vha amba
Naho ho bvelela tshiwo itshi, Vho-Mabasa vho kombetshedzea u bvela phanḓa na mishumo yavho, uri vha kone u unḓa vhana vhavho. "A ringo tsireledzea, fhedzi ahuna zwine ra nga ita sa izwi ri tshi fanela u unḓa miṱa yashu. Ndo xelelwa nga thengiso yanga yoṱhe namusi fhedzi ndi fanela u vhuya hafhu u bvela phanḓa," vha engedza.
Mbudziso ire milomoni ya vhanzhi ndi uri vharengi na vhane vha dzula afho vho tsireledzea na?. Na zwinwe zwifhaṱo zwo tsirelezea naa, kana zwi nga ri wela ri songo lavhelela?
Mulangi wa masipala wa Thulamela, Vho-Masala Makumule, vhane vhavha muḓivhi wa u pulana ḓorobo, vhari vha masipala vha kha maano a u thoma tsedzuluso ya tshiofisi yau sedzulusa tshivhangi tsha u wa ha tshifhaṱo itshi.
Vho-Makumule vho engedza uri ho ḓa ṱholi nṋa vhe vha topola zwifhaṱo zwine zwa fanela u khwinifhadzwa. "Ro vhaisala vhukuma nga tshiwo itshi. Zwe ra dovha hafhu u wanulusa ndi u engedzwa ha tshumelo nga vhe vha sielwa tshifhaṱo itshi nga vhane vhatsho vha kale. O touvha mashudu mavhuya uri ahuna matshilo o lozwaho. Ri lila na makhulu vhe vha huvhala kha tshiwo itshi," vha amba.