Tshiṱori nga: Thembi Siaga. Ṱhalutshedzo nga: Khathutshelo Raliphaswa.
Tshigwada tsha vhagudiswa vha tshikoloni tsha nṱha tsha Photani kusini kwa Mulamula vhuponi ha Ha-Malamulele vho akhamadzwa nga u wanala ha tshitumbu tshi tshi papamala ngomu ha phaiphi dza utshimbiza malaṱwa tshikoloni itsho.
Vhagudiswa avha vha tshi wana tshitumbu itshi vhovha vha khou ḓi lugisela mitshino ya miṱambo ya sialala, nga matsheloni a Lavhuṱanu la fumbili malo Fulwana. Munwe wa vhagudiswa avho ori u ima nṱha ha phaiphi idzo dza malaṱwa, a dzinginya tshipiḓa tsha phaiphi iyo he tsha wa. Nga u toda u vhona ngomu ha phaiphi iyo, vhagudiswa vhori u ṱolela ngomu afho vha vhona tshitumbu tshi tshi papamala.
Uya nga ha muambeli wa mapholisa wa vunḓu ḽa Limpopo, Vho-Malesela Ledwaba,vhari ho vhidzwa vha yunithi ya vhaphulusi uri vhaye tshikoloni itsho nga tshihaḓu. "Vho kona u phulusa tshitumbu itsho. Zwa zwino ahu ḓivhei mbeu ya muthu uyo ngauri tshitumbu itsho tshovha tsho tshinyala. Fhedzi ṱhoḓisiso dza mapholisa dzi khou bvela phanḓa," vha amba.
Munwe wa vhagudiswa e asi ṱoḓe u bulwa dzina, we awana tshitumbu itsho, ane avha mugudiswa wa murole wa vhufumi mbili uri: "Rori u huwelela ri tshi ṱoḓa thuso, na vhanwe vhagudiswa vha sendela vha tshi ṱoḓa u vhona uri mulandu ndi mini. Rovha ro tshuwa vhukuma. Vha murole washu rovha ri khou fanela u ṅwala ndingo nga ḓuvha iḽo, fhedzi nyimele iyi ya zwi konḓisa uri ri ṅwale."
Vhagudiswa vho ṱoḓelwa thuso ya muhumbulo u bva kha dokotela wa muhumbulo na miraḓo ya vhafunzi vha kusi uko, nga Musumbuluwo wa la furaru-thihi Fulwana.
Muraḓo wa khorombusi ya tshikolo itsho, Vho-Justice Mashaba, vhari tshiwo itsho tsho sia vhadzulapo na vhagudiswa vhe na nyofho na dzi mbudziso dzi konḓaho.
Tshitumbu itsho zwa zwino tsho vhiewa mutsharani wa muvhuso wa Giyani, hune ho lindelwa u ṱoliwa uri ndi mini tshivhangi tsha lufu. Hone tshitumbu itsho atshiathu utaluswa.
Hu khou eletshedzwa vhadzulapo vha kusi uko vhane vha vha na mashaka o ngalangalaho vha kwame muofisiri wa ṱhoḓisiso kha mulandu uyu, Vho-Mzamani Shivhambu, kha 082 3199 724, kana nomboro dza 08600 10111, kana vha dalele tshiṱitshi tsha tsini navho, kana u rumela mulaedza kha epe ya MysapsApp.