Tshiṱori nga Elmon Tshikhudo. Ṱhalutshedzo nga Khathutshelo Raliphaswa.
Ṅwaha wa 2025 u vhonala u tshi penya kha murendi na muimbi o kundaho kha pfufho ane a ḓivhea nga ḽa Vendaboy Poet, ane a vha na mafhungo a takadzaho kha vhafuni vhatikedzi vhawe. Mutsila ane a khoḓiwa kha lushaka u khou vhea zwithu zwa u fhedzisela hu si kha phurojeke nthihi fhedzi khulwane – bugu ya zwirendo na aḽibamu ya muzika – zwoṱhe zwo vhetshelwa u kunga vhathetshelesi u mona na shango.
Bugu, tshifhiwa tshawe kha vhatikedzi vhawe tsha maṅwalo tsha zwenezwino, ndi ṱhanganyelo yo ṱanganedzwaho nga vhuronwane ya zwirendo zwine zwa ṱoḓisisa thero dza vhuḓiṱalusi, vhulamukanyi ha matshilisano, lufuno, na u konḓelela. U ḓivhelwa u ṱanganyisa vhurendi ha thendo ya mvelele ya Venḓa na thekhinikha dza u anetshela mafhungo dza musalauno, Vendaboy Poet u fulufhedzisa u vhala hu kombetshedzaho hune ha ḓo sia muhumbulo u sa fheli.
Aḽibamu yawe ine ya khou ḓa i isa phanḓa na u sumbedza u kona u shuma sa muṅwali wa nyimbo na mutambi wa nyimbo. Maipfi a hone ndi a muthu nga eṱhe o dzikaho fhedzi ane a tshimbidzana na shango ḽoṱhe, a tshi khou lwa na mafhungo a ngaho u sa eḓana, vhuaḓa, na u tshinyadzwa ha mupo.
"Nga zwilidzo zwayo zwi fhiriselaho na nyimbo dzi tshuwisaho, aḽibamu yo ḓiimisela u pfala kha vhafuni vha muzika kha tshaka dzoṱhe," a ralo. "Zwine zwa fhambanya hedzi thandela ndi u ḓikumedzela hanga hu sa dzinginyei kha u shumisa vhutsila sa tshishumiswa tshi re na maanḓa tsha u ṱalutshedza matshilisano na tshanduko. Mushumo wanga a si u ḓimvumvusa fhedzi – ndi khuwelelo ya u dzhia vhukando, u ṱuṱuwedza vhathu uri vha humbule nga ha mishumo yavho kha u vhumba vhumatshelo ha khwine ha vhone na zwitshavha zwavho," a engedza.
O engedza nga uri thandela dzoṱhe mbili dzo ṱuṱuwedzwa nga lutendo lwawe lwo dzikaho lwa uri vhatsila vha na vhuḓifhinduleli ha u shumisa maipfi avho u amba ngoho kha maanḓa na u sumbedza nndwa dza vhane kanzhi vha dzhielwa fhasi.
"Ndi a fulufhela uri bugu yanga na aḽibamu zwi ḓo ṱuṱuwedza vhathu uri vha humbule nga nḓila ya usa sasaladza, u ḓipfa vho dzika, na u ita zwithu nga tshivhindi vha tshi khou ṱoḓa shango ḽo lugaho na ḽo linganelaho kha vhoṱhe," a engedza.
Maḓuvha a u bviswa a tshiofisi a thandela dzoṱhe a ḓo ḓivhadzwa nga tshifhinga tsho teaho.