Tshiṱori nga: Kaizer Nengovhela. Ṱhalutshedzo nga: Khathutshelo Raliphaswa.
Tshikolo tsha zwa mitambo tsha, Benny's Care tshine tsha wanala Tshiozi vhuponi ha Vhembe, kha vhupo ha Sinthumule ndi dzi ngwena kha miṱaṱisano ya lushaka ya Kay Motsepe ya vhana vha fhasi ha minwaha ya fumi-ṱahe. Vha Benny's Care vho kunda tshikolo tsha nṱha tshibvaho Free State tsha Tloutlisong nga zwikoro zwivhili khathihi kha mutambo wa u fhedzisela we wa tambelwa tshikoloni tsha nṱha tsha Bekker ngei Magaliesburg nga Mugivhela.
Muṱaṱisano uyu wa Kay Motsepe ndi munwe wa miṱaṱisano mihulwane kha shango ḽino, hone vho pfufhiwa masheleni a linganaho miḽiyoni tharu, vha vhuimo ha vhuvhili vha pfufhiwa masheleni a zwigidi zwa maḓana a sumbe. Vhe vha fhenya vha mavunḓu vho ṱuwa na masheleni a zwigidi zwa ḓana na fuṱhanu wa dzi rannda.
Vha Benny's Care vho thoma lwendo lwa u imedzana uvha vhagwena nga u kunda kha miṱaṱisano ya vunḓu nga ḽa fumbili-raru Khubvumedzi. Hezwi ndi zwe zwa vha ṋea tshikhala tsha u dzhenelela miṱaṱisano ya lushaka, ye ya farwa u bva nga ḽa raru u swika sumbe Tshimedzi ngei Magaliesburg, he vha wana gundo ḽavho.
Vho ḓou kunda tshikolo tsha nṱha tsha Virginia tshine tsha wanala Free State nga Lavhuna ḽa iṋa Tshimedzi. Vhori vha tshi tamba vha thoma vho kora zwikoro zwi linganaho zwa tshithihi-tshithihi, he vha fhedza vho kona u kora zwikoro zwiṱanu kha zwina kha thaho ndatisi.
Vha Benny's Care a vha thomi u fhenya, vhovha ngwena dza lushaka nga ṅwaha wa 2016 kha miṱaṱisano ya vha fhasi ha minwaha ya fumi-iṋa, vha ya u imelela Afrika Tshipembe kha tshiphuga tsha ḽifhasi tsha World Danone ngei Fura, vhe fhasi ha vhulangi ha mugudisi vho Mbishi Mokoena, vhane vha kha ḓi vha mugudisi wavho na namusi. Vhunzhi he vha vha ya ngei Fura, vho tamba kha mitambo ya naṅwaha.
Benny's Care yo sikwa nga ṅwaha wa gidimbili-ina, hone dzina iḽi ḽo vhumbiwa zwi tshi bva kha dzina ḽa mutumbuli na mulangi, Vho David "Benny" Mufamadi, vhane vha vha mutambi wa kale, mugudisi na mulangi wa thimu i ḓivheaho ya Tshiozwi Dynamos. Vho Mufamadi vha dovha hafhu vhavha mufunzi wa tshivhidzo tsha AFM tshire Tshiozwi.
Tshikolo itshi tshi na vhagudiswa vha ḓana furathi-malo na vhagudisi vha fumi-malo, hure na mirole u bva kha R u swika wa vhufumi-mbili. Uya nga Vho Mufamadi, vhagudiswa vha swikaho phesenthe ya fumalo ndi vhane vha dzula kha phera dza hanefho tshikoloni sa izwi vha tshi bva kha mavunḓu a nnḓa ha Limpopo.
Vho Mufamadi vhari vho takala vhukuma nga u pfufhiwa masheleni aya, hone vha bodo ya tshikolo na vhafaramikovhe vha ḓo dzudzanya uri a fanela u shumiswa kha themamveledziso dzi fhio dza u alusa tshikolo.
Vha tshi vhuya Tshiozwi nga Sondaha, vho ṱanganedzwa nga Vhamusanda Vho Makhado Sinthumule. Vhamusanda vhari vha a ḓi rwa khana nga zwe Benny's Care ya zwi swikelela hone zwi vhea kusi kwa Tshiozwi kha mapa. "Vhana vhane vhoḓi dzhenisa kha zwa mitambo vha anzela u shuma zwavhuḓi kha mishumo yavho ya tshikolo," vha amba.
Vho Sinthumule vha dovha hafhu vha engedza uri Benny's Care yono no bveledza madzhakanḓila kha nḓowetshumo ya mitambo u fana na Khuliso Mudau e a tambela Mamelodi Sundowns na thimu ya lushaka ya Bafana Bafana, Lesedi Kapinga, e a tambela Orlando Pirates na vhatambi vha kale vha Black Leopards Ivan Mahangwahaya na Wiseman Maluleke.
Mugudisi Vho Mokoena vho livhuwa vhatambi vhoṱhe vhe vha tamba kha miṱaṱisano iyi, vhari:"Vhatambi vho tamba vho ḓi imisela. Ndo vha vhudza uri arali ra shuma zwavhuḓi kha khalaṅwaha ino, ri ḓo kana zwavhuḓi. Ro ḓi lugisela mitambo ya ḽigi, ine ya ḓo thoma ino vhege."