Tshiṱori nga: Thembi Siaga. Ṱhalutshedzo nga: Khathutshelo Raliphaswa.
Vha Elim Hlanganani Society ine yavha tshiimiswa tsha u ṱhogomela vhaaluwa vhovha na ḓuvha ḽau takadza ḽa vhaswa, vha na ndivho yau thusa vhagudiswa vha murole wa vhufumimbili khau khetha mabuḓo ane o fanela. Mushumo uyo wo farelwa tshikoloni tsha nṱha tsha Waterval, we wa dovha hafhu wavha wa u thusa u engedza masheleni au pembelela minwaha yavho ya furaru nga Khubvumedzi ṅwaha uno.
Ngau farana zwanḓa na vha Yunivesithi ya Venda (Univen) na vha gudedzi ḽa Vhembe TVET Kholedzhi, mushumo wo mvumvusa nau gudisa vhaswa ngeno wovha u khou dovha hafhu wa vha thusa u farisana na uvha ṱumanya. Vhunzhi ha vhaswa vho losha mushumo uyo, he vha ṱangana na zwikhala zwo fhambanaho kha mabuḓo avho, vho kona uvha na kuhumbulele na kuvhonele kwo khetheaho kha mabuḓo manzhi na mabindu ane vha ṱoḓa u a thoma, vha dovha hafhu vha guda mitshino ya sialala.
Tshe sosaithi ya Elim Hlanganani ya simiwa nga ṅwaha wa ḓaṱahe fuṱahe-raru, yo no thusa vhadzulapo vha mivhundu i swikaho fumbilimbili ya vhupo ha Elim. Sa dzangano ḽi sa shumeli malamba, vha ḓi kumedza kha u lwela u thusa vhaaluwa, vhana, na vhaswa, uri vha vhuyelwe nga tshumelo dzo fhambanaho u bveledzisa mivhundu ya vhupo ha Elim.
Mugudiswa wa murole wa vhufumimbili, Mbuyelo Ngobeni, o sumbedzisa u livhuwa mushumo uyu na zwe vha sosaithi ya vha thusa ngazwo. "U ḓa kha mushumo uyu zwo nthusa kha u nanga buḓo ndi na nḓivho nga halo na uri ndi dzi fhio thero dzine nda fanela udzi ṱhogomela nga vhuronwane. Ndi ṱoḓa u thusa na vhanwe vhagudiswa nga nḓivho ye ndai wana fhano uri vha thusalee vha sa ḓo fhedza ṅwaha vho dzula hayani," a amba.
Vho-Dakalo Mavhona, vhane vha vha mugudisi kha gadzano iḽi ḽi sa shumeli malamba, vho ṱalutshedza uri masheleni ane o kuvhanganwa kha mushumo uyo, aḓo thusa u khau alusa dzangano na uvha thusa uri vha kone u thusa mivhunduni ya vhupo ha Elim.
Mugudisi vha tshiimiswa tsha mveledziso ya mahayani ngei Univen, Vho-Jethro Zuwarimwe, vho dodombedza uri vha yunivesithi vho ḓi kumedzela kha u thusa mivhundu. Vha dovha hafhu vha sumbedzisa vhuṱhogwa hau thusa vhaswa nga dzi phurogireme dzine vha yunivesithi vha dzi ṋea nau ṱuṱuwedza vhaswa khau rumela dzi khumbelo magudedzini nga tshifhinga.Ṱhoho: