Tshiṱori nga: Thembi Siaga. Ṱhalutshedzo nga: Khathutshelo Raliphaswa.
Vha khamphani ya muvhuso ya mabisi a Great North Transaport (GNT) vho rwela ṱari u netshedzwa ha tshumelo dza inthanethe dza mahala (Wi-Fi) kha vhanameli vha mabisi ayo. Vha khamphani iyi vho ḓivhadza uri mabisi a mahumi mavhili are Bulugwane, na mabisi a mahumi mavhili a vhupo ha Tshitandani a ḓo ṋea vhathu tshumelo iyo, izwi vho zwi ḓivhadza kha zwileludzi zwa vhudavhidzani.
Ndivho khulwane ya tshumelo iyi ndi u ṋea vhanameli tshumelo ya inthanethe musi vhe kha nyendo dzavho. Zwine zwa vha tendela uri vha kone u ita zwithu zwinzhi zwi fanaho na u guda, u ita tsedzuluso, na u kona u swikelela mafhungo vha sa shumisi mbadelo dzavho dza u ḓura. Wi-Fi iyi i netshedzwa vhanameli yo tikedzawa na nga dzi khunguwedzo.
Munameli wa bisi ḽa GNT, Vho-Rose Shilambyane, vho ṱahisa dakalo ḽavho nga ha tshumelo iyi, "Ndo takala vhukuma nga uvha na Wi-Fi iyi musi ndo namela bisi. Fhedzi ndi tama ngavhe vha tshi nga khwinifhadza na nzulele ya mabisi aya sa izwi vhunzhi hao ono ṱahala nga ngomu."
U sengulusa kana u vhona nyanḓadzo dza vhathu vha u bva kha minwaha ya fumi malo zwo iledzwa. Mulangi wa vhudavhidzani kha muhasho wa mveledziso ya ikonomi, vhupo na vhuendi ya vunḓuni ḽa Limpopo, Vho-Mthunzi Dlamini, vho ṱahisa uri tshumelo iyi yovha i tshipiḓa tsha ndeme tsha u shandukisa GNT uvha khamphani i vhuyedzaho. Vhari, "Tsheo ya u ṋea vhathu tshumelo ya Wi-Fi ya mahala zwi anana na mbonelo ine vha GNT vha vha nayo ya u tshimbila na tshifhinga kha sia ḽa thekinolodzhi. Vha GNT vho nanga vhaḓisi vha tshumelo ya nethiweke nga murahu ha u topola vhare na tshumelo ya khwine kha u langa dzi khunguwedzo kha mabisi, na u vhuyedza kha khamphani."
Vho-Dlamini vhari u pangwa ha Wi-Fi hovha hu u ṱoḓa u kunga vhanameli vhanzhi na vhaḓisi vha dzi khunguwedzo. "Vhathu avha badeli kana u ḓi ṅwalisa uri vha kone u shumisa Wi-Fi," vha engedza.
Kha tshiṱatamennde tsha vha ḽihoro ḽapolotiki la Democratic Alliance (DA) vho ṱahisa mbilaelo dzavho nga ha u rangisa phanḓa u ṋea vhanameli Wi-Fi ngeno huuri ṱhoḓea dza vhanameli a dzi dzhielwi nṱha. Tshiṱatamennde itsho tsho ṅwalwa na dzi mbilaelo dzine vha GNT vha ṱangana nadzo kha u ḓisela vhanameli mabisi o linganaho nga kha kotara ya ṅwaha wa masheleni ya 2022/23. Ho dovha hafhu ha ḓiswa mbilaelo dza u reilwa mabisi ane hango tea u tshimbila magondoni.
Vha DA vho ḓivhadza uri vha ṱoḓa uvha na nyambedzano na mudzulatshidulo wa komiti ya LEDET, Vho-Mapula Mokaba-Phuwana, vhane vhari muofisiri muhulwane wa GNT, dokotela Vho-Matate Mokoele, vha fanela u ṋea ṱhalutshedzo nga ha tsheo ya u pfufha konṱiraka ya u netshedza Wi-Fi kha mabisi avho.