Tshiṱori nga: Kaizer Nengovhela. Ṱhalutshedzo nga: Khathutshelo Raliphaswa.
Muṱa wa Ha Sebola u wanalaho fhala Tshiozwi, wo sala wo hanganea nga murahu ha musi nnḓu yavho ire na phera dza fumi yo swa ḽore. Itsho tshiwo tsho itea nga Musumbuluwo wa ḽararu ḽa Lambamai.
Mune wa muḓi Vho-Simon Sebola, vhari mashudu mavhuya ndi uri hovha hu sina muthu hayani musi tshiwo itsho tshi tshi bvelela. Vhari vho tou foinelwa nga vhadzulatsini vhe vha vha vhudza uri muḓi wavho u khou swa, he vhari vha tshi swika vha wana nnḓu yoṱhe yo swa ḽore, hu tshi katelwa na goloi.
Vhari vhadzulatsini vho vha vhudza uri vho pfa muthuthubo nga ngomu nḓuni zwenezwo i tshi khou swa.
Vhari naho vhadzulatsini vha tshiri i ngavha yo tou fhiswa, vhone ahuna zwine vha nga amba vhunga vho vha vhe siho. Vhari zwa uri ho itea mini, vha khou zwi siela mapholisa musi vha tshi fhedza u ita ṱhoduluso dzavho. Vhari vha tou livhuwa Mudzimu we avha tsireledza.
Vho Sebola vhari vha khou anganyela uri tshinyalelo ya u swelwa nga nnḓu yavho i a fhira rannda dza milioni nthihi.
Vhari muṱa wavho wo livhana na tshiimo tshi konḓaho vhunga vha sina ha u dzula na zwiḽiwa, na haya maḓuvha a paseka khavho, ha ngavhi avhuḓi. Vhari vha kho tou rabela uri munwe vho are na mbilu yavhuḓi a vha thuse uri vha kone u ḓi imisa hafhu nga vhoṱhe.
Muambeli wa mapholisa Brigadier Motlafela Mojapelo vho khwaṱhisedza tshiwo itsho, vhari vho vula mulandu wa tsedzuluso. Vho hanedza mavharivhari a uri uyo muḓi wo tou fhiswa. Vhari mapholisa vha khou ita tsedzuluso, vha kaidza uri vhathu vha litshe u sumbana nga minwe.