Tshiṱori nga: Victor Mukwevho. Ṱhalutshedzo nga: Khathutshelo Raliphaswa.
Vha khoro ya vhutsila kha masipala wa Thulamela vha ḓo fara bepha ḽa vhatsila ḽa u pembelela vhufa, ḽine vhatsila vhanzhi vha khou ḽi lavhelela. Bepha iḽo ḽi ḓo farwa holoni ya Flora Masakona nga ḽa fumbili-mbili na fumbili-raru Khubvumedzi. U pembela vhufa, hu ḓovha na zwigwada zwi fhiraho fuiṋa zwa mitshino ya sialala ya u fhambana, vhaimbi, na zwigwada zwa vhoramuzika vha nyimbo dza sialala zwine zwa ḓo mvumvusa vhathu nga maḓuvha ayo mavhili.
Kha nyambedzano ya nyanḓadza mafhungo ya Limpopo Mirror na Vho Vhulenda Neluonde, muofisiri wa vhudavhidzani ha khoro iyo, vhari bepha iḽi ndi ḽa u lugisela ṱano ḽa vhutsila ḽine ḽa ḓo farwa nga ḓuvha ḽa u pembela vhufa ḽa lushaka ḽine ḽa ḓo farelwa Makwatambani (2010 Centre) nga ḽa fumbili-nṋa Khubvumedzi.
Vho Neluonde vhari vha ḓo dzudzanya vhamvumvusi vhane vha ḓo mvumvusa vhathu na tshiṱiriki tsha Vhembe nga ḓuvha ḽa vhufa ḽa lushaka. "Vha masipala wa tshiṱiriki tsha Vhembe vho ḓa kha rine vha tshi ṱoḓa uri ri vha sumbedze mitshino ya sialala ine zwigwada izwi zwa ḓo i tshina nga ḓuvha ḽa bepha ḽa u pembela vhufa ḽa ṅwaha na ṅwaha ḽa masipala," vha amba.