Tshiṱori nga: Elmon Tshikhudo. Ṱhalutshedzo nga: Khathutshelo Raliphaswa.
Vhudzulapo vha kusi kwa Tshivhuyuni vho sala vhe na mbudziso dzi sa fhindulei vhege yo fhelaho nga murahu ha u wanala ha zwiambaro na dzi bugu zwa Fiona Matodzi we a ngalangala ṅwaha wo fhelaho, fhedzi ene mune hu sina na tswayo ya uri u ngafhi.
Fiona we avha e na minwaha ya ṱahe o ngalangala nwaha wo fhiraho nga ḽa fumi-thihi Thangule, ovha e mugudiswa wa tshikolo tsha fhasi tsha Dzindi. Zwiambaro zwe zwa wanala zwi tou fana kokotolo na zwe avha o ambara a tshi ngalangala, na bugu idzo dzovha dzo nwalwa dzina ḽawe. Zwo wanwa masimuni a Tshivhuyuni nga vhazwimi tsini na mulambo wa Gologodo, nga madekwana a Lavhuraru ḽa rathi Khubvumedzi.
Vho Vuledzani Dathi, muambeli mufareli wa SAPS ya Vhembe, vhari mapholisa vho lumiwa ndevhe hu tshi waniwa zwiambaro izwi. "Mapholisa vho mbo livha vhuponi uho, he vha wana bugu tharu dzire na madzina awe, mukhwama mutswu, tshuniki ya muvhala wa ṱaḓa-na-lutombo, dzhesi ya mivhila yau fana na tshuniki, tshiluvhelo, zwienda zwa tshikolo, mulenze na ribono. We a khwaṱhisedza uri zwiambaro izwi na bugu ndi zwa Fiona ndi mme awe Vho Mulalo Mufunwaini," hu amba Vho Dathi.
Vhadzulapo vhori u pfa nga ha u wanwa uhu, vha gidima vha tshi ya u vhona vha ḓadza vhupo uho. O touvha mashudu mavhi uri hovha hu sina tswayo ya uri Fiona u ngafhi. Nga ḓuvha ḽi tevhelaho, vhadzulapo vho dovha vha ya u lingedza u sedza Fiona, zwe vhutoto.
Munwe wa vhadzulapo we asi ṱoḓe u bulwa dzina uri ene u tenda uri Fiona o dzumbiwa hunwe, hone we a mu thuba a ngavha o tou tshuwa a ḓa a posa zwithu izwi afho tsini na mulambo. "Vha tshi sedza bugu idzi, zwia vhonala uri asi kale dzo poswa afho. Ngavhe dzovha dzo poswa kale dzovha dzi tshi ḓovha dzo no tshinyala nga mitsho ya u fhambana u bva mahoḽa. Fiona a ngavha a kha ḓi tshila o tou honelwa hunwe."