Tshiṱori nga: Thembi Siaga. Ṱhalutshedzo nga: Khathutshelo Raliphaswa.
Vha muṱa wa ha Baloyi vha kha ḓi vhilaedzwa nga u ngalangala ha Ntshovelo Baloyi wa minwaha ya vhumi-rathi a bvaho Mabobo, tsini na Elim, e a ngalangala mathomoni a ṅwaha uno. Ntshovelo ane a bva kha muṱa wa vhathu vhaṱuku, o ngalangala nga ḓuvha ḽe havha hu na vhuṱambo tshikoloni nga ṅwedzi wa Ṱhafamuhwe ṅwaha-uno.
Ntshovelo ovha a tshi dzula na mmane wawe, obvahayani nga matsheloni a tshi ya tshikoloni a si vhuye hayani ḓuvha iḽo. Vha muṱa vho lingedza u mu ṱoḓa fhethu hunzhi, vha swika na kha zwisi zwa tsini na Elim hu tshi katelwa Hamakhakhi, fhedzi u ḓi dina havho a zwingo vhuyedza tshithu sa izwi vha songo muwana.
Zwa zwino ho no fhela minwedzi ya rathi tshe a ngalangala. Khaladzi awe, Kulani Xihlomulo, o ṱahisa u vhaisala hawe nga u ngalangala ha khaladzi awe lwa tshifhinga tshilapfu. "Ndi khou laṱa fulufhelo hone ndi aḓi vhudzisa uri naa afho hune avha hone u khaḓi tshila kana ha tsha tshila naa. Ndi nga takala arali a vhuya a bvela phanḓa na pfunzo dzawe," a amba nga mbilu vhuṱungu.
Muraḓo wa komiti ya wadi u bva Elim, Vho Elvis Maswanganyi, vhari sa tshigwada tsha vhupo havho vho dovha hafhu u lingedza u ṱoḓa Ntshovelo minwedzi mivhili yo fhiraho. "Ro mu ṱoḓa vhusiku na masiari fhedzi ra balelwa u mu wana. Hune ro pfa na ḽauri o vhonala hune ha rengiswa zwivhaswa nga madekwana a ḓuvha le a ngalangala ngalo, zwe zwa ri kombetsheza uri ri lingedze u mu ṱoḓa, fhedzi zwa bala. Ri khou vhilaela vhukuma nga hae, hone ri humbela uri vhadzulapo vha ri thuse u mu ṱoḓa," vha amba.
Muambeli wa mapholisa a Waterval, Muofisiri Vho Foster Rambau, vho khwaṱhisedza uri vha khou sedzulusa mulandu wa muthu o xelaho, zwi tshi tevhela u ngalangala ha Ntshovelo Baloyi. Vhane vha vha na vhuṱanzi vhune ha nga thusa kha mulandu uyu a founele nomboro dza lushaka dza u lwa na vhugevhenga kha 0860 10 111, kana vha ise muvhigo kha tshiṱitshi tshire tsini navho.