Tshiṱori nga: Silas Nduvheni. Ṱhalutshedzo nga: Khathutshelo Raliphaswa.
Ramabindu vha ḓivheaho Vho-Nnditsheni Matsila na mufumakadzi wavho Vho-Alice Matsila vho pembela maḓuvha avho a mabebo ya minwaha ya fusumbe ṱhanu nga Mugivhela wa ḽa rathi Shundunthule he vhunzhe ha zwiṱaraṱa zwa kusi kwavho ngei Ṱhohoyanḓou Block F zwa valwa sa izwi ho ḓala vhaeni.
Ho ḓa maḓana na maḓana a vhathu kha tshimima itshi hu tshi katelwa vhahura, vha muṱa na dzi ṱhama dza vha muṱa wa ha Matsila.
Hovha ho ḓala dzi khombole na mifhululu hu tshi pembelwa ḓuvha iḽo. Vhaeni na vha ha Matsila vho mvumvuswa nga mitambo nau tshina hu ngaho Malende na Tshigombela. Vharangaphanḓa vha vhupo uho vho tamela vha muṱa wa ha Matsila minwaha minzhi nauri vha nga ṋea vhane vho malana zwa zwino ngeletshedzo dza uvha na mbingano yavhuḓi.
Vho-Nnditsheni na Vho-Alice Matsila vho malana nga 1968 hone vha tshe vho takala lune na vhanwe vha vhafunani kha kusi kwavho vha a ṱuṱuwedzea uri navho vha funane nau ṱhogomelana u fana na vha muṱa wa ha Matsila.
"Ri na minwaha ya fuṱhanu-ṱhanu ro malana, hone ro takala. Ro kona u fhedza minwaha iyi ri roṱhe ro takala ngauri ria fulufhedzea kha mbingano yashu, vhaswa vha ano maḓuvha vha malana fhedzi vha fhambana nga murahu ha minwedzi nga hone usa fulufhedzea kha mbingano dzavho. Sa vhanna, tshashu nga huvhe u funa vhafumakadzi vhashu nau thetshelesa vha tshi ri eletshedza. Ndi zwone zwine zwa khwaṱhisa mbingano," vha amba Vho-Nnditsheni.
Vhamusanda Vho-Mmbangiseni Nemalamangwa, vhane vhavha ṱhama ya Vho-Matsila ya tsini tsini, vho vha fhululedza khau pembela maḓuvha avho a mabebo nga ḓuvha ḽithihi. Vho-Nemalamangwa vhari ṱhama yavho Vho-Matsila vhovha gudisa zwinzhi nga hau langula mabindu, vha dovha hafhu vha vha livhuwa nauri bindu lavho ḽa dzi khuhu ḽi khou bvelela zwavhuḓi.
Vho-Nemalamangwa vhari ndi kale vha ṱhama na Vho-Matsila vha tshe vhashumi ngei ḓoroboni ya Johannesburg, vho vhona vhafunani vha muṱa wa ha Matsila vha tshi aluwa kha vhushaka na mbingano yavho. Vhari navho vha ṱoḓa u tevhela nḓila ya Vho-Matsila navho vha pembele na muṱa wavho.