Tshiṱori nga Elmon Tshikhudo. Ṱhalutshedzo nga Khathutshelo Raliphaswa.
Musi vha tshee vhaṱuku, vharathu vha Mathoho vho aluwa vha tshi khou thetshelesa muzika wa khotsi avho vho no fhiraho fhano shangoni, Vho Hudson Mphatheleni Mathoho, mutambi wa kaṱara a ḓivheaho na muimbi wa Tshivenḓa. Vho ṱuṱuwedzwa nga ifa ḽavho, vharathu Reckson na Godfrey Mathoho vho bveledza lufuno lwo dzikaho lwa muzika. Musi tshifhinga tsho no swika, vho mbo ḓi vhumba bennde vha i rina nga madzina ḽa Tshinombeloni Family.
Zwo tea, dzina ḽa bennde ḽi bva kha miri ya munombelo yo ṱavhiwaho hayani havho. Ṋamusi, muzika wavho u ṋea "mutshelo" une wa fusha mimuya ya vhafuni vhatikedzi vhavho vhanzhi.
Tshigwada tsho vha tshi tshi khou shuma lwa miṅwaha, tshi tshi khou aluwa nga nḓila i sa shanduki kha nḓowetshumo ya muzika wapo. Na dzi aḽibamu dza fusumbe dzo fhelelaho – dzoṱhe nga Tshivenḓa – nga dzina ḽadzo, tshigwada tshi bvaho Tshivhulana nnḓa nyana ha Sibasa tsho khoḓiwa sa tshiṅwe tsha zwigwada zwa muzika wa sialala wa khwinesa, wa tshifhinga tshilapfu, na u sa shanduka. Ngeno mabengele manzhi o no swika na u tuwa, Tshinombeloni Family yo dzula i ngoho kha midzi yawo.
U sumbedza u diimisela havho kha vhufa havho ha Venda, tshigwada tsho bvisa aḽibamu yavho ya vhumalo, Zwivhuya, nga Lambamai 2024. Aḽibamu ndi ya nyimbo dza rathi, yo rekhodiwaho kha Easy Road to Fame Studio ngei Tshifulanani nahone yo bveledzwaho nga Vho Nelson Dama, i na nyimbo dzo bvelelaho dzi ngaho dzina . tshitengela Zwivhuya na Salani .
Murangaphanḓa wa tshigwada, Vho Reckson Mathoho vho takala nga maanḓa nga ha mushumo muswa. "Ri khou vhuya na luimbo lu takadzaho, ro lugela u vhuyedzedza vhuimo hashu ha nṱha kha muzika wa sialala wa Tshivenḓa. U sa pfufha nga tshithu kha pfufho dza Tshima nwaha wo fhelaho a zwo ngo ri kula nungo – zwo tou ri tutuwedza. U swika he ra swika hone zwo sumbedza uri ri khou tshimbila nga nḓila yo teaho. Ri ḓo bvela phanḓa na lushaka ulwu, naho vhanzhi vha tshi zwi dzhia zwi si zwa vhubindudzi. Ri nga kha ḓi sa dzhielwa fhasi kha u vhidziwa na ma bepha, fhedzi a ri nga ḓo vhuya ra litsha u ita muzika," vha amba.
Vho Mathoho vho engedza nga uri vho vha vha tshi vho shuma kha mushumo wavho u tevhelaho. "Nga u ṱavhanya ri ḓo thoma lwendo lwa u ṱuṱuwedza u mona na vunḓu. A si uri vhafuni a vha funi muzika uyu—a hu na vhuḓidini ho eḓanaho ha u u ṱuṱuwedza. Muzika a si wa u wana tshelede fhedzi fhedzi ndi wa lufuno. U nga bvisa luimbo, nahone lu nga kha ḓi sa rengisa zwavhuḓi, fhedzi zwenezwo a zwi ambi uri u fanela u ima. Sa tshigwada, ri funa vhukuma mushumo washu, nahone ri fulufhedzisa vhafuni vhashu mulilo wo engedzeaho tshifhingani tshi ḓaho," vho amba.