Tshiṱori nga: Kaizer Nengovhela. Ṱhalutshedzo nga: Khathutshelo Raliphaswa.
Lavhuṱanu ḽa fumi-raru Tshimedzi, lovha ḓuvha ḽa vhuṱhogwa, ḽa dakalo kha vhagudiswa na vhadededzi vha tshikolo tsha fhasi tsha Tshithuthuni, tshine tsha wanala Nzhelele. Tshikolo itsho tsho netshedzwa senthara ya vhutsila ha u fhambana u bva kha vha MultiChoice.
Tshikolo itsho tshe tsha fhaṱwa nga ṅwaha wa gidi-ḓaṱahe fuṱahe-ṱahe, ndi tsha vhuṱhogwa kha mugudiswa wa kale kha tshikolo itsho Vho Fulufhelo Badugela, muofisiri muhulwane wa MultiChoice Afrika. Kha fulo ḽa vha MultiChoice ḽa u netshedza senthara idzi, iyi ye ya netshedzwa tshikolo tsha Tshithuthuni ndi ya vhufumi-thihi kha minwedzi ya fumi-mbili fhedzi.
"Vhanwe vha vhana avha vha nga ḓi vha tshipiḓa tsha SuperSports ḽinwe ḽa maḓuvha, u swika zwezwo, vha ḓo kana mbuyelo dza khwine ngauri mishumo ya mivhili i thusa u khwinifhadza mitakalo yavho na u khwinifhadza nḓila dzine vha shumisa dzone zwikoloni. Ro farana zwanḓa na vha muhasho wa pfunzo, ri khou alusa lushaka lwa vhaswa vhare na mutakalo," hu amba Vho Badugela.
Vho Badugela vhari lwa minwaha ya fumi-iṋa yo fhiraho, mushumo wa Let's Play yo no ṋea vhaswa zwikhala zwa u dzhenelela kha zwa mitambo, he vha netshedza masheleni swikaho a fumbili wa dzi rannda. Vho no gudisa magudisi vha swikaho vha maḓana mararu na fumi-ṱhanu kha maitele maswa a pfunzo dza mivhili, hune ha kwamea vhagudiswa vha swikaho miḽiyoni dza 1.5 wa vhagudiswa nga u funziwa hafhu nnga ha pfunzo ya zwa mivhili zwikoloni na mivhunduni.
Ndivho ya mushumo uyu kana senthara ya Let's play ndi u ṋea zwikolo na vhathu vha mivhundu ya mahayani vhupo ha u sumbedzisa vhutsila havho. Senthara iyi ya zwa mitambo i touvha mathomo a u ṱuṱuwedza vhana uri vhavhe na matshilo a mitakalo ya khwine na nungo.
Vhagudiswa zwa zwino vha ya kona u tamba mitambo ya u fhambana kha luvhanḓe lwavho luswa lwa Let's Play, hune vha tamba mitambo i fanaho na hockey, tennis, netball na minwe minzhi. Tshikolo itsho tsho dovha hafhu tsha netshedzwa dzi bege dzire na zwiambaro na zwishumiswa zwa u shumisa mitamboni. Na vhagudisi vho teaho vha zwa mitambo vha ḓo gudiswa pfunzo ya zwa mitambo.
Vhane vha ḓo shumisa senthara iyi ndi vhagudiswa vha tshikolo tsha Tshithuthuni, vhagudiswa vha zwikolo zwa tsini na vhadzulapo. Vho Badugela vho ita khuwelelo kha vhaswa uri vha shumise senthara idzo u khwinifhadza matshilo avho.
Thoho ya tshikolo Vho Namadzavho Tondani vhari vha livhuwa vhukuma senthara iyi. "Vhana vhashu ndi vhare na ṱhoḓea dza tshipentshele, hone ndi zwa vhuṱhogwa u bveledzisa vhukoni havho," hu amba Vho Tondani. Vha engedza uri tshikolo itsho ḓi imisela u shumisa senthara iyo.