Tshiṱori nga: Victor Mukwevho. Ṱhalutshedzo nga: Khathutshelo Raliphaswa.
Tshigwada tsha muzika wa rege, The Natty Lions vhane vha wanala Vhembe, tshine tsha rangiwa phanḓa nga Nndanduleni Elijah Dombo, ane a ḓivhea nga ḽa "The Lion Poet", na Ndivhuwo "Zion Teacher" Mulugisi Mamafha, vho nangiwa kha dzi pfufho dza muzika une wa khou aluswa wa Afrika Tshipembe (SAUMA) dza ṅwaha na ṅwaha dza vhufumi. Vho nangiwa kha tshiteṅwa tsha luimbo lwa Rege lwa khwine, nga luimbo lwavho 'Home Mount Zion', u bva kha aḽibamu yavho ya "Precious Mother".
Mamafha u bva kusini kwa Tshilapfene, ngeno Dombo a tshi bva Vuwani. "Rovha ro takala nga uvha kha mutevhe wa vhane vha ḓo pfufhiwa, hone ri fulufhela uri ri ḓo vhuya na tshiphuga hayani. Sa vhoramuzika, ri shuma ro ḓi nekedzelo. Ro ri ri tshi nangiwa nga u vhona mishumo yashu, ra pfa ro hulisea vhukuma," vha amba.
Dombo uri vho thoma u shumisana nga murahu ha u tou ṱangana lwa u thoma. Aḽibamu yavho ya u tou thoma, "Jah Rastafari", yo anḓadzwa nga ṅwaha wa gidimbili fumi-sumbe, ya tevhelwa nga aḽibamu ya "Legalise It" nga ṅwaha wa gidimbili fumi-malo.
Nga ṅwaha wa gidimbili fumi-ṱahe , "Jah Rastafari" yo nangiwa kha pfufho dza SAUMA he ya kunda kha tshiteṅwa tsha luimbo lwa khwine lwa rege, nga luimbo "Mary My Love" kha yeneyo aḽibamu.
Nga ṅwaha wa gidimbili fumbili, vho anḓadza aḽibamu, "Huna Nḓaḓo Shangoni". Kha pfufho dza SAUMA dza vhumalo vho nangiwa nga luimbo lwavho lwa "Thambulo Yanga", nga ṅwaha wa gidimbili fumbili-mbili vho nangiwa hafhu nga luimbo lwavho, "Precious Mother", u bva kha aḽibamu ya "Precious Mother", ye ya anḓazwa mathomoni a ṅwaha uno.
Muungo une vha u shumisa, wa mitaladzi ya vhurendi, ndi zwe zwa ita uri tshigwada itshi tshi ḓivhiwe na u takaleliwa nga vhathu vhanzhi. "Ri anzela u pfa vhatevheli na vhatakaleli vha muzika washu, vha tshi amba uri muzika washu u na vhutshilo, zwine zwa tou sumbedza uri ri khou fhaṱa lushaka nga muzika washu. Vhatevheli na vhafuni vha muzika washu vha ari tikedza, zwine zwa amba zwihulu kha rine," hu amba Mamafha.