Tshiṱori nga: Elmon Tshikhudo. Ṱhalutshedzo nga: Khathutshelo Ralphaswa.
Vhamusanda Vho Ratshilumela Edwin Ramalivhana vho ita khuwelelo kha vhadzulapo vha Makwarani uri vha songo dzumba vhana vhavho vhanotshilw na vhuholefhali ,fhedzi vha vha ise sentharani dzire hone dzo vha fanelaho. Vho Ramalivhana vho amba izwi nga tshifhinga tsha u netshedzwa ha senthara ntswa ya Muphirimia Foundation. Tshiimiswa itshi tsho tumbulwa nga muhashi wa radio ya lushaka ya Phalaphala FM, Vho Humbulani Nengovhela uri vha ṱhogomele vhaholefhali. Mushumo wau netshedzwa ha senthara wo farelwa Philamisevhe Disabled Centre nga Lavhuna ḽa fumi-rathi Shundunthule.
"Maḓuvha au vhona vhana vha vholefhali sa samba kana u lifhedzelwa ha vhabebi o fhela. Vhana vhatshilaho na vhuholefhali vha ḓi fana na muthu muṅwe na muṅwe. Avha faneli u khethululwa tshitshavhani. Vha nga ita zwoṱhe zwine vhaṅwe vhathu vha kona u ita, hone kha zwinwe vha ita vhukhwine kha vhathu vhane asi vhaholefhali. Vha a shela mulenzhe khau fhaṱa mivhundu sa vhathu vhothe zwihulu arali vho iswa kha zwikolo zwo khetheaho na kha dzi senthara dzau u vha pfumbudza nga zwikili zwau fhambana," vha amba.
Vho amba zwauri vhone na vharangaphanḓa vhahulwane vha sialala vho tikedza khumbelo ya Vho Nengovhela nga tshihaḓu musi vha tshi humbela vhupo hau thoma senthara. "Ri kusi kune kwa khou bveledzwa zwa zwino, hone ri ḓo ita zwoṱhe u vhona uri hu na mveledziso kha vhupo hashu. Vho Nengohela vha na ndoro khulu dza tshitshavha na vhaholefhali, hone ri khou vha nea vhupo uhu uri vha kone u bveledza ndoro yavho. Ri fulufhea zwauri vhanwe vhathu vha ḓoḓa vha lambedza mushumo uyu nauri hu ḓo fhedza ho fhaṱiwa senthara ya khwine," vha engedza.
Vho Nengovhela, mutumbuli wa senthara na mudzulatshidulo wa tshiimiswa, vho ṱahisa u takala havho nga tshifhinga tsha mushumo wau netshedza wa tshiofisi. "Ro takala vhukuma nga u netshedza vhupo uhu. Ro no thoma, husikale ri ḓovha ri khou shuma nga vhuḓalo, ri tshi ita zwa vhulimi na hunwe u pfumbudzwa ha vhukoni," vha amba. Vho Nengovhela vho livhuwa murangaphanḓa wapo wa sialala nga u vha ṋea mavu hone vha humbela vhabebi vha vhana vha vhaholefhali uri vha vha ḓise sentharani iyi, ine zwa zwino yo no thoma u shuma nau thusa vhaholefhali.
Nga tshifhinga tsha mushumo, Vho Tshimangadzo Esther Sinyegwe vho khethiwa uvha mudzulatshidulo wa bodo ya vhalangi.