Tshiṱori nga: Frank Mavhungu. Ṱhalutshedzo nga: Khathutshelo Raliphaswa.
Mitambo ye yavha yo lindelwa ya ḽigi ya SAB ya vunḓu, ye yavha yo vhetshelwa u tambiwa mafhelo a vhege yo fhiraho luvhanḓeni lwa Nkowankowa ngei Tzaneen i ḓo tambiwa mafhelo a vhege ino. Mitambo iyo i ḓo tambiwa kha luvhanḓe lwa Nkowankowa sa zwe zwavha zwo dzudzanywa.
U kundelwa u bveledza ngwena dza maisela ha vha tshiimiswa tsha maisela a vhupo ha Capricorn vhege yo fhiraho zwo kombetshedza mitambo uri i fhiriselwa phanḓa. Khuḓano vhukati ha thimu ya Mohlabile United na Lebash u bva kha ḽigi ya maisela a Capricorn yovha i khou ṱoḓa u lamukanywa, ye ya lugiswa nga Lavhuraru. Mulangi wa ḽigi ya vunḓu, Vho-Refiloe Khoza, vho eletshedza thimu idzi mbili uri vha bvele phanḓa na ndugiselo dzavho u tamba mitambo ya mafheloni a vhege, u itela u takalelwa nga mulamukanyi.
Vho-Khoza vhari luvhanḓe lune mitambo iyi ya ḓo tambelwa hone a i nga ḓo shandukiswa. Magwena a vhupo vhuṋa vhune ha ḓo tamba mitambo iyi ndi Sunrise FC ya waterberg, Kingdom FC ya Sekhukhune, Mukula Young Santos ya Vhembe na Nkowankowa Continenetals FC ya Mopani.
Mugudisi muhulwane wa thimu ya Mukula Young Santos, Vho-Eric Nevhutanda, vhari vha thimu ya Mukula Young Santos vho ḓi lugisela kha khaedu dzoṱhe dzine vha nga ṱangana nadzo kha mitambo iyi ya vunḓu. Vha thimu iyi vha na vhege tharu vha khou ḓi lugisela mitambo iyi ya ṅwaha na ṅwaha.
Thimu nthihi i ḓo tamba mitambo miṋa kha muṱaṱisano uyu, hone thimu mbili dza khwine dzi ḓo tamba kha ḽigi ya ABC Motsepe. Ṅwaha wo fhelaho, vha United Stars vho imelela vhupo ha Vhembe kha ḽigi dza maisela, hone zwa zwino vha khou kunguwedza kha khethekanyo ya Limpopo ya ḽigi ya ABC Motsepe, zwi tshi tevhela u tamba havho zwavhuḓi kha mitambo yau aluswa.