Tshiṱori nga Bernard Chiguvare. Ṱhalutshedzo nga Khathutshelo Raliphaswa.
Vhaṱoli vha tshumelo dza zwa mutakalo ha mupo fhano kha Tshiṱiriki tsha Vhembe (EHS) vho thoma fulo ḽau ṱola zwibveledzwa zwine zwa rengisiwa kha zwimauswu zwa mahayani na kha vharengisi vhane vha rengisa zwiṱaraṱani, hune vho lavhelesa zwihulu zwiḽiwa zwine zwa fana na nama ya khuhu, khovhe, na nama ya kholomo. Izwi zwi khou tevhela zwe ha ha na zwiwo zwe zwa vhigiwa kha tshiṱiriki tsha Vhembe malugana na zwiḽiwa zwine zwi vhonala zwo fhelelwa nga tshifhinga.
Kha vhege mbili dzo fhiraho, vhagudiswa vha paḓaho furathi vha tshikolo tsha nṱha tsha Denga, tshikolo tsha nṱha tsha Mukhwantheli, na tshikolo tsha fhasi tsha Makahlule kha tshiṱiriki tsha Vhembe vho ḓou thathuvhwa maongeloni nga murahu hau gungula upfa u vhavha thumbuni nga nwambo wa zwiḽiwa zwe vha ḽa.
"Ro vhuya ra ita fulo ḽau ṱola zwiḽiwa nga ṅwedzi nga ṅwedzi, fhedzi zwine zwa khou itea zwino, zwi khou ri kombetshedza uri ri ṱole ḓuvha ḽiṅwe na ḽiṅwe. Ri pfesesa uri vharengisi havha vha renga zwibveledzwa zwavho kha mavhengele ane vha rengisi zwithu nga vhunzhi, zworalo ri dalela na aneo mavhengele vhege iṅwe na iṅwe," hu amba Vho Micheal Mukwevho, mulanguli vha tshumelo dza vhupo ha mutakalo kha tshiṱiriki tsha Vhembe.
Vho Mukwevho vho amba nga ha dzi khaedu kha maitele a zwino ane avha a khou tevhedzwa nga vharengisi. Musi vha EHS vha na mushumo wa u khwaṱhisedza uri hu tevhedzwa nḓila kwayo kha sia ḽa zwa mutakalo, vha sekhithara ya mveledziso ya ikonomi kha mimasiapala yapo vha havha tshi khou lavhelesani na u ṅwaliswa ha mabindu. Izwi zwi amba uri vha EHS vhavha vhasina zwidodombedzwa zwa vhuṱhogwa.
"Musi vharengisi vha tshi kundelwa u tevhedza maga o vhetshelwaho nga vha zwa mutakalo, vha a badelisiwa masheleni a ndaṱiso. Fhedzi, naho vho badelisiwa masheleni ayo, vhanga dovha hafhu vha wana ṱhanziela ubva kha vha masipala wapo," vha amba.
Vho Mukwevho vho ombedzela kha ḽauri u vhea zwiḽiwa kha dzi cooler box a zwingo tendelwa sa izwi zwi tshi engedza khombo yauri zwiḽiwa izwo zwi tshinyale.
Vha EHS vho amba zwauri vhathu vhane vha dzulela u vhoniwa mulandu ndi vhabvannḓa, fhedzi izwo azwi bviseli khagala tshivhangi tsha zwiwo izwi. " Havha vhathu vha renga kha mavhengele ane a rengisa zwithu nga vhunzhi hanefha vhuponi ha tsini navho. Ri fanela u dovha hafhu ra dzhiela nṱha mitakalo ya vhana vhane vha ḽa zwiḽiwa zwine zwa bikiwa zwikoloni. Hafhu futhi, zwithu zwine zwa sheliwa kha zwimune-mune zwi fanela u ṱoliwa nga vhuronwane," vha amba.
Vho Mukwevho vho amba zwauri u tou amba tshivhangi tsha u vhaisa zwi tshi tevhela u ḽa zwiḽiwa asi zwithu zwine zwa dzula zwi khagala. Vhari zwi nga bva kha zwithu zwinzhi, hu tshi katelwa zwiṅwe zwiḽiwa zwine vhaṅwe vhana vha bva nazwo ubva mahayani vha ḓa u ḽa na vhaṅwe vhana zwikoloni kana vha tshi khou tamba. U vhona zwimauswu vhukhakhi azwi bviseli tshivhangi khagala naluthihi.
Vha EHS vha ṋea pfumbudzo ya ṅwaha na ṅwaha kha vhathu vhane vha bika zwiḽiwa zwa zwikoloni hone vha ita na khuwelelo kha vhadzulapo uri dzulela u vhea phanḓa mutakalo na u kuna kha zwine vha ita. Vha tshi engedza kha zwine vha ita, vha khou thoma na fulo ḽau dzhena fhethu hune ha rengisiwa zwiḽiwa vha laṱa nau tshinyadza zwiḽiwa zwine zwavha zwi kha nzulele isi yavhuḓi kha mitakalo ya vhathu uri vha thivhele zwiḽiwa izwo khau tshinyala zwa rengiwa nga vhathu vha ḽa.
Madalo a vha Limpopo Mirror kha zwimauswu zwine zwa wanala Tshikota na Elim o bveledza zwine zwa ngavha khombo kha vharengi. Fhedzi vhunzhi ha vharengisi vhovha vha tshi khou hana u amba na vho ramafhungo kana u vha tendela ngomu ha mavhengele avho.
Muṅwe mune wa tshimauswu vho amba zwauri vha a bvisa zwibveledzwa zwo fhirelwaho nga tshifhinga ngomu ha vhengele ḽavho. Naho nama dza khuhu dzine vha rengisa dzi tshi vhonala dzi dzavhuḓi, adzina datumu yauri dzi ḓo fhirelwa lini nga tshifhinga. Vho amba zwauri zwibveledzwa zwavho zwia ṱavhanya u rengiwa lune u ṅwaliwa datumu yau fhirelwa nga tshifhinga zwivha zwi si zwa ndeme.
Vho Lucky Mneno, vhane vhavha na tshimauswu kha vhupo ha Elim, vho amba zwauri: " Ndi dzulela u ṱola zwibveledzwa zwanga nga misi, arali nda wana zwo fhirelwa nga tshifhinga, ndo a zwi fhisa u itela uri vhana vha si swike hune vha zwi renga vha ḽa. Ndi dovha hafhu nda humisela vhathu masheleni avho arali vho vhuisa zwibveledzwa zwo fhirelwaho nga tshifhinga arali vho zwi renga kha nṋe."