Tshiṱori nga: vha Development. Ṱhalutshedzo nga: Khathutshelo Raliphaswa.
"Ni songo ima u guda" ayo ndi maipfi e avha a kha tswayo ya tshifhaṱo tshiswa, tshe tsha rwelwa ṱari nga Lavhuṱanu ḽa iṋa Thangule tshikoloni tsha nṱha tsha Hanyani tshire Sagole vhuponi ha Tshipise nnḓa ha Musina. Vha khoro mbusi ya tshikolo itsho vho ira tshifhaṱo itsho uri 'Nga Tshumisano', tsho fhaṱwa nga ndivho ya u ṱanganyisa tshikolo, Yunivesithi ya Johannesburg, na vha South African Jewish Board of Deputies (SAJBD), vhe vha nekedzela kha tshifhaṱo itshi vho imelela vhupo ha vha Juwishi. Kha tshifhaṱo itshi ho netshedzwa dzi khomphiyutha, Wi-Fi i sina mukano, na zwinwe zwishumiswa zwau thusa matshudeni vha maṱiriki.
Tshifhaṱo itshi tsho fhaṱwa ngau vhona uri kha tshikoni itshi ahuna zwishumiswa zwa khwine, arali zwi hone, zwivha zwi si zwinzhi. Tshikolo itshi tshi shumela vhagudiswa vha zwisi zwa tshivhalo kha vhupo uho ha Niani, hune vhunzhi ha vhagudiswa vha tshimbila khiḽomitha dza fumiiṋa uya na u vhuya tshikoloni ḓuvha liṋwe na liṋwe.
U bva nga ṋwaha wa gidimbili fumiina, vha UJ vhovha vha na vhuṱumanyi na kusi kwa Gwakwani, hone vho no ṋea vhupo uho dzi sola, khireshe, na bekhara. Kha tshipitshi tsha u vula tsha ṱhoho ya tshikolo ya UJ phurofesa Vho-Letlhokwa Mpedi, vho sumbedzisa tswayo ye ya ṅwalwa uri "donated with love by the Jewish community". Vho amba nga ha ṱhoḓea dza vhagudiswa uri vhavhe na vhuḓifulufheli kha vhone vhane, vha dovha hafhu vha shumisa na mitaladzi u bva kha nyimbo "Children, hold onto your dream" lwa William Howard. Vhagudiswa vho eletshedzwa uri vha songo furalela miḽoro yavho nga upfa maipfi a vhathu a u vha nyamisa. Vhari ndi khwine vha tshi tou shuma vho ḓi imisela hone nga mafulufulu.
Ṱhoho ya tshikolo tsha Hanyani Vho-Thifhelimbilu Ndou, vhari tshifhaṱo itshi tshi touvha mathomo a tshikolo itshi. "Uvha na tshumelo ya nethiweke zwi ḓo ri thusa u swikisa tshikolo tshashu kha ḽifhasi ḽa namusi. Vhagudiswa vha ḓo kona u shumisa inthanethe kha mishumo yavho ya tshikolo," vha amba.
Vho-Ndou vha engedza uri vha livhuwa vha khoro mbusi, vha UJ, na vha SAJBD nga u kona u bveledzisa mushumo uyu wavhuḓi: "Rovha ri na mbilaelo yau wana tshumelo ya inthanethe, u bveledzisa mabammbiri, u ṋwala na ha u vhalela. U vhusa tshikolo hu sina zwishumiswa zwo fanelela ndi khaedu kha zwikolo zwinzhi zwa vhupo ha mahayani. Ria balelwa u bveledzisa vhagudiswa vha khwine ngau shaya zwishumiswa."
Mudzulatshidulo wa khoro mbusi Ndivhuwo Mbedzi u eletshedza vhadzulapo uri vha ṱhogomele tshifhaṱo itshi. "Ndi fulufhedzisa vha UJ na SAJBD uri ri ḓo tshi ṱhogomela na u tsireledza kha mavemu. Ri fulufhela uri hu ḓo bveledzwa vhathu vhane vha ḓo bveledzisa vhupo hashu he havha ho hangwiwa," a amba.
Muambeli wa SAJBD Vho-Charisse Zeifert vhari vha pfa vho takala uvha tshipiḓa tsha mushumo uyu. "Ri tshi ṱangana na Vho-Mpedi, ro zwi vhona uri uyu ndi mushumo une ra fanela uvha tshipiḓa tshawo. Ro vhona u shaya ha kusi uku, na nḓila ine vhathu vha lambeza zwisi zworaliho na u zwi sedzela fhasi. Rovha ri na ndivho ya u ḓisa tshanduko matshiloni a vhagudiswa. Mushumo uyu wo kona u bveledzwa zwavhuḓi nga u shumisana ha vha UJ na SAJBD," vha amba.
Mushumo uyu wo kunguwedzwa nga mahosi, vhagudisi, vhagudiswa, na vhulangi ha tshikolo. Miraḓo ya UJ na SAJBD navho vho losha mishumo uyu.