Tshiṱori nga: Anton van Zyl. Ṱhalutshedzo: Khathutshelo Raliphaswa.
Vha khoro ya vhuhosi ha Mphephu-Ramabulana vho humbela vha khothe ya ndayotewa uri vha vheye khosi pfareli ya lushaka lwa Vhavenda. Vha khothe khulwane vhari u vhewa ha khosi pfareli a zwinga ḓo itea sa izwi huna khumbelo ine ai athu u khunyela.
Vha vhuhosini vho isa khumbelo kha vha mukovho wa Ṱhohoyanḓou ya khothe khulwane ya vunḓu nga ṅwedzi wa Tshimedzi ṅwaha wo fhelaho, vha tshi lingedza u khwaṱhisa tshanḓa tsha vho MEC vha Coghsta uri vhate khosipfareli. U imiswa ha Vho-Toni Mphephu uvha khosi pfareli nga vha khothe ya ndayotewa nga ṅwaha wa gidimbili fumbilithihi, zwo sia lushaka lwa Vhavenda vha sina murangaphanḓa. Mathomoni a ṅwaha uyo, vha Coghsta vho imisa u holela miraḓo ya vhashumi vha vhuhosini.
Kha mabambiri a khothe, vha vhuhosini vhari u hanelwa u vhewa Vho-Mavhungu David Mphephu sa khosi pfareli azwi vha fushi. Vho-Mphephu vho nangwa nga vha nnḓu ya vhuhosini sa ene muthu o teaho u vhewa sa khosi pfareli sa izwi hu khaḓi lwelwa vhuhosi lwa mulayo.
Vho MEC na Muphirimia vha Limpopo, na Vho-Masindi Clementine Mphephu – ane a khou lwela vhuhosi, vho hanedza khumbelo ya vhuhosini ya u vhewa Vho-Mphephu. Thimu ya vhaimeleli vha Vho-Masindi Mphephu vhari mulayo utea u thoma wa lugisa milandu vha saathu u vhea murangaphanḓa wa Vhavenda.
Muhaṱuli Vho-AML Phatudi vhari mulandu uyo asi wa tshihaḓu. Vho dovha hafhu vhari khumbelo iyi a i tendelani na milayo ya khothe ya ndayotewa. "Zwo ḓowelea uri inwe ya thaidzo fhasi ha mulandu wa 773/2012 ndi u ḓivhea ha muthu sa khosi ya lushaka lwa Vhavenda," vha amba.
Vha thimu ya mulayo yau farela ya vha vhuhosini, SO Ravele vho sedzulusa mulayo we wa ṋewa nga muhaṱuli Vho-Phatudi. "Vhavhuhosini vho isa khumbelo nga tshihaḓu uri vha kanedzane na mulayo wa khothe khulwane kha vha khothe ya ndayotewa. Nga ḽa ṱhanu Fulwana ṅwaha-uno, vha khothe ya ndayotewa vho tenda khumbelo ya vhavhuhosini yau hanedza mulayo wa khothe khulwane,"
Vhavhuhosini vho ṋewa u swika nga ḽa fumi Thangule uri vha fushe khothe nga kha khumbelo yavho yau hanedza mulayo wa khothe. Fhedzi arali Muphirimia kana Vho-Masindi Mphephu vha ṱoḓa u hanedza khumbelo iyo, vha fanela u isa khumbelo yavho hu saathu u swika ḽa fumbiliiṋa Thangule ṅwaha-uno.
Vho-Johann Hammann, muimeleli wa Vho-Masindi Mphephu, vhari vha ḓo hanedzana na khumbelo iyo. Vhari vha tenda uri Vho-Mavhungu Mphephu avhango tea u vhewa sa khosi pfareli. Vha dovha hafhu vha pomokwa u amba vhuṱanzi vhusi hone fhasi ha mulayo kha mabambiri a khothe musi vha tshi tikedza u vhewa ha Vho-Toni Mphephu khau vhewa sa khosipfareli.