Tshiṱori nga: Entertainment. Ṱhalutshedzo nga: Khathutshelo Raliphaswa.
Nga hone u vhilaela nga u xetshelwa nga muzika wa sialala na vhufa havho, vhaaluwa vha vhupo ha Vhembe vho sika tshigwada tsha African Indigenous Instrument Presevation NPC tshine tsha vhulunga muzika uyo. Tshigwada itshi tshine tsho sikwa nga vhoramuzika vha bvaho kha mivhundu yau fhambana kha tshiṱiriki tsha Vhembe, vha dalela senthara ya vhutsila na mvelele ya Ṱhohoyanḓou luvhili nga ṅwedzi u ita dzi nḓowenḓowe dzavho. Tshigwada itshi avha shumisi zwishumiswa zwa muzika zwa musalauno, vha ḓi imisa na uḓi ṱongisa nga zwishumiswa zwe zwa shumiswa nga mirafho ya murahu.
Nḓila yavho i fhira u vhulunga muzika fhedzi, vha dovha hafha vha vusuludza nau sheledza hune havha na u shaya kha sia ḽa muzika. Nga kha dzi wekishopho dzavho, u mbvumbvusa vhathu, na mbekanyamushumo dzavho dza u gudisa vhathu nga ha muzika wa kale. Vha na ndivho ya u gudisa vhaswa nga ha uḓi kukumusa na uḓi ṱongisa nga ha muzika wa vhufa havho.
Uya nga ha mutumbuli wa tshigwada itshi, Vho Maluta Matsheka, vhari nḓivho yavho ndi u alusa nau tsireledza muzika wa kale we wa alusa mirafho u mona na dzhango ḽa Afrika lwa minwaha na minwaha yo faho. "Zwine zwa fhambanisa muzika washu ndi vhubvo na vhudzivha ha muzika washu. Ri hana u shumisa zwishumiswa zwa muzika zwa musalauno kha muzika washu kana nḓila ine vhathu vha musalauno vha shumisa ngayo. Ri tama u bvela phanḓa na nḓila ye vho makhulukuku washu vha ri gudisa ngayo muzika. Ri tenda kha u hulisa ifa lavhamusala ula uri lisongofa, ri fanela u vhulunga muzika washu nga nḓila ye vhomakhulukuku washu vha u sia ngayo," vha amba.
Vho Matsheka vhari, tshivhindi tsha mishumo yavho ndi u vhulunga zwishumiswa zwa ṅwaniwapo, zwine zwa sumbedza vhundeme ha muzika wa kale."Zwishumiswa zwi fanaho na mbila, tshihwana, lugube na tshipotolio, zwi ṱumanywa vhathetshelesi na vhamatongoni vhavho," vha amba.
Muṅwe wa vhatumbuli vha tshigwada itsho, Vho Mackson Mavunda vho amba zwauri: "Muzika washu asi wau mbvumbvusa fhedzi, u dovha hafhu wau kovha nḓivho. Nga u shumisa nḓila dze vhomakhulukuku vhashu vha shumisa dzone, ari hulisi mishumo yavho fhedzi, ri dovha hafhu ra vhulunga vhuimo hashu kha sialala ya Afrika."
Tshigwada itshi vho livhuwa mulwela sialala vhane vha vha muraḓo wa komiti ya vhutsila ha Limpopo vha tshiṱiriki tsha Vhembe Vho Nndoweni Malala, vhe vha vha ṋea thikhedzo yavho kha u bveledza nau alusa vhukonani vhune vha khou vhu sika kha mivhundu ya tshiṱiriki tsha Vhembe.