Tshiṱori nga: Sports. Ṱhalutshedzo nga: Khathutshelo Raliphaswa.
U aluwa wavha mualuwa are na nungo ndi zwa vhuṱhogwa kha vhaaluwa hone vha zwi rangisa phanḓa, izwi ndi zwe zwa ṱuṱuwedza vhomakhulu vha fuiṋa vha bvaho Tshakhuma uri vha fhaṱe mivhili yavho ivhe ire na nungo hone ire na mutakalo. Vhomakhulu avha, vhane vha dzulela uya u ṱhaṱhuvhiwa zwa mutakalo kha kiḽiniki ya Tshakhuma, vho ḓi sikela tshigwada hone zwa zwino vho rwela ṱari thimu yavho ya bola ya milenzhe ine ya vhidzwa Tshakhuma Clinic Old Age FC.
Muṅwe wa vhatumbuli vha thimu iyi ya bola ya milenzhe ya vhaaluwa vhane vhavha Vho Ntshavheni Agnes Muduvhadzi, vho vhudza vha nyanḓadza mafhungo ya Limpopo Mirror zwauri zwine vha takalela u fhira zwoṱhe ndi u tamba bola ya milenzhe. "U bva nga ṅwaha wa 2019, rovha ri tshi da fhano ra ṱangana sa vhomakhulu ngau dzhenelela kha mitambo yo fhambanaho uri ri dzule mivhili yashu yo khwaṱha. Sa izwi zwa zwino ro no aluwa, ri ita zwine ra kona fhedzi ngauri u dzula hayani husina zwine ra ita zwi engedza zwikhala zwau farwa nga malwadze a songo lavhelelwaho. Ri anzela u ṱangana luvhili nga vhege mudavhini wa bola wapo, fhedzi ria ṱuṱuwedzana uri ri dzulele u ṱhogomela mivhili yashu naho ri mahayani ashu,"
Vho engedza zwauri vho lingedza u ṱuṱuwedza na vhaaluwa vha vhakalaha, fhedzi zwa konḓa vhukuma. "Ri tshi thoma na nḓowenḓowe dzashu ro kona u kunga vhakalaha vhararu, vhe vha fhedza tshifhinga na rine. Fhedzi vhavhili vha laṱela thaula, mashudu mavhi muthihi wavho vha fhedza vho fhira fhano shangoni. Fhedzi izwo zwoṱhe azwi ri nyamisi kha zwine ra khou ita zwine ra zwi funa fhasi ha u gudiswa nga mulangi washu, Vho Livhuwani Mavhungu," vha amba.
Vho Muduvhadzi vhari naho vha tshi takalela u tamba bola ya milenzhe, vha ṱangana na dzi khaedu dzi konḓaho sa izwi vhasina zwishumiswa zwo fanelaho zwine vha ḓo shumisa kha mitambo yavho. "Arina zwiambara na zwienda zwo fanelaho, fhedzi izwo azwi ri thivheli kha u ḓiphina kha mutambo washu wavhuḓi. Ri a takalela uvha na mitambo yau imedzana na vhaṅwe vhaaluwa vha bvaho kha mivhundu ya kule na tsini, fhedzi ari koni uzwi swikelela sa izwi risina zwiendedzi kana masheleni o linganaho ane a ḓo ri isa kule na tsini u tamba mitambo na vhaṅwe vhaaluwa," vha amba.
Mishumo yavho yavhuḓi ine vhaaluwa avha vha khou ita zwo ḓou phaḓaladzwa kha zwileludzi zwa vhudavhidzani nga mudzulapo wa vhupo ha Tshakhuma, Ndidzulafhi Ratshiluma, we a ita khuwelelo kha vhathu uri vha thuse vhaaluwa avha nga zwishumiswa zwo teaho zwine vha fanela u zwi shumisa kha mitambo yavho. Uri vha kone u thusa, vhathu vha nga kwama Ndidzulafhi kha nomboro dza 072 089 3850 kana vha kwama muṅwe wa vhatumbuli vha thimu ya vhaaluwa, Vho Ntshavheni Agnes Muduvhadzi kha 076 532 1627.