Tshiṱori nga: Thembi Siaga. Ṱhalutshedzo nga: Khathutshelo Raliphaswa.
Vhadzulapo vha Elim vho sala ho bilufhala nga murahu ha u pfa u vhulawa ha muhashi wa kale wa Elim FM Tshifhiwa Theophelus Mugwena we avha atshi bva kusini kwa Chabani, tsini na Elim. Mugwena we avha a tshi ḓivhea khwine nga ḽa "Mr Tee", o thunthswa a vhulawa kusini kwa Nghomunghomu, ha Malamulele, nga madekwana a Lavhuna ḽa fumi-iṋa Khubvumedzi.
Tshiwo itsho tsho bvelela nga murahu ha u fara mvuselelo ya kereke tsini na vhengele ḽi rengisaho zwikambi ḽa Nghomunghomu nga awara ya vhurathi. O thuntshwa nga mune wa vhengele iḽo.
Uya nga Vho Sgt Busisiwe Khuzwayo, muofisiri wa vhudavhidzani ha vhupholisa ha Malamulele, Mugwena ovha e nḓilani ya u bva kerekeni ya Kingdom Life, he avha e mufunzi hone, a tshi ya u dalela muḓi wa tsini na vhengele ḽa Nghomunghomu bottle store he a thuntshwa a lovha lwa tshuṱuhu nga mune wa vhengele iḽo. Vhari muhumbulelwa vho farwa na zwenezwo, hone vha tshiṱitshini tsha mapholisa tsha Malamulele. Tshivhangi tsha u thuntshwa uhu a tshi athu u ḓivhea zwa zwino.
Mbudziso dzi sa fhindulei dzo sia vhane vhovha vhe tsini na Mr Tee vho vhaisala vhukuma. Kenny Mugwena, murathu wa mufu, o ṱahisa u vhaisala ha muṱa nga ha u thuntshwa ha mukomana wawe. "Ro vhaisala sa muṱa. Ro xelelwa nga shaka ḽe ḽavha ḽi tshi ri ṱanganya misi yoṱhe sa muṱa nga mishumo ye avha a tshi ita. Ri fulufhela uri tshanḓa tsha mulayo tshi ḓo vhonala kha mulandu uyu," a amba.
Mutumbuli wa Elim FM, Vho Innocent Maringa, vho isa ndiliso dzavho kha muṱa wo xelelwaho. "Ri livhuwa tshumisano ya Mr Tee kha u shumisana na rine zwavhuḓi lwa minwedzi miraru nga ṅwaha wa 2021, ovha e muhashi wavhuḓi vhukuma nga mishumo yawe. Muya wawe u eḓele nga mulalo," vha amba.
Muhumbulelwa, Vho Gezani Chauke vha minwaha ya fuṱhanu, vho ḓi vhonadza khothe ya madzhisiṱiraṱa wa Malamulele nga Musumbuluwo wa ḽa fumi malo Khubvumedzi. Mulandu wo fhiriselwa phanḓa kha ḽa fumbili malo Khubvumedzi hu u itela na khumbelo ya beiḽi.