Tshiṱori nga Kaizer Nengovhela. Ṱhalutshedzo nga Khathutshelo Raliphaswa.
Vhadzulapo vha Hamavhunga na zwisi zwa tsini vha khou gwa phindulo nga murahu hau imiswa ha mushumo wau vusuludzwa ha bada ya khiḽomithara dza 3.7 ya D3669, ine ya bva Havhunga uya Phadzima. Mushumo uyo wo imiswa hu si na u davhidzana na vhadzulapo.
Mushumo wo thoma nga ṅwedzi wa Fulwi ṅwaha wo fhiraho, fhedzi wa ḓou ima nga murahu ha miṅwezi ya malo. Thandela, ine yovha i khou ḓura masheleni a paḓaho miḽiyoni dza furaru-ṱahe, yovha i khou fanela u fhela nga ṅwedzi wa Fulwi ṅwaha uno. Fhedzi ubva nga ṅwedzi wa Phando ṅwaha uno, mushumo uyo wovha wo ima hone ho tou fhela luṱa lu swikaho phesenthe dza fumi-iṋa.
Muambeli wa komiti ine ya khou rangaphanḓa mushumo, Dokotela Vho Robert Mutshinya, vho ṱahisa tshiimo sa zwine azwina mitshelo hone ndiu fhedza tshifhinga. Vho pomoka vha dzhendedzi ḽa dzi bada Limpopo (RAL) na muhasho une wo lavhelesana na mushumo uyu zwauri vha khou tamba nga vhathu hone vha fanela u dzhia vhuḓifhinduleli hoṱhe khau kundelwa havho u vhona uri mushumo uyu ua tshimbila hone wa khunyeledza zwavhuḓi.
Vho Mutshinya vho amba zwauri arali RAL na muhasho vha tenda zwauri vho kundelwa u langa mushumo, vha fanela u ḓivhadza vhadzulapo, uri vha shumisane khau wana nḓila yau bvela phanḓa. Vho dovha hafhu vha amba zwauri MEC vha tshumelo dza vhathu, bada, na themamveledziso vha fanela u ita dzi ṱhoḓisiso dzau ṱoḓulusa uri ndi mini zwe zwa itea uri mushumo u ime.
Mulangi wa vhudavhidzani ha RAL, Vho Luyanda Sithole, vho amba zwauri mushumo wo ṱangana na khaedu ye yavha i songo lavhelelea yau lenga u fhela ha mushumo nga nṱhani ha zwiimo zwisa langei zwe zwa thithisa vhane vha thandela uri vha bvele phanḓa na mushumo. "Zwa zwino ri kati nau tandulula khaedu idzo. Zwa zwino zwoṱhe zwi zwanḓani zwa vha mulayo vhane vha ḓo zwi sedzulusa. Ri takalela u konḓelelwa nga vhadzulapo musi ri tshi bvela phanḓa na u tandulula khaedu yashu," vha amba, Vho dovha hafhu vha engedza zwauri maga o fanelaho a ḓo dzhiiwa malugana na vhane vha thendela vhe vhasi dzhiele nṱha mushumo wavho nga murahu hau avhelwa thendela.