Tshiṱori nga Silas Nduvheni. Ṱhalutshedzo nga Khathutshelo Raliphaswa.
Lwa u tou thoma nga murahu ha miṅwaha minzhi, vhadzulapo vha Hamutsha Khwekhwe vho newa madi o kunaho a bvaho kha bombi dzavho nga tshifhinga tsha vhuṱambo. Hezwi zwo tevhela u thomiwa ha thandela yau gwiwa ha gwedzho ya tshitshavha yo tikedzwaho nga vhadzulapo vhone vhaṋe.
Vho Rendani Tshikau, mudzulatshidulo wa thandela ya maḓi ya Sanzhe Lufhena, vhari zwi a takadza u vhona vhuḓidini havho vhu tshi ḓisa tshanduko kha tshitshavha. Thandela ya maḓi yo ṋetshedza mbofholowo i ṱoḓeaho vhukuma kha vhadzulapo vha muvhunduni vhe vha vha vho tambula lwa miṅwaha minzhi vha si na nḓisedzo i fulufhedzeaho ya maḓi o kunaho a u ṅwana u shumisa miḓini yavho.
Vho Tshikau vho ṱalutshedza uri mathomoni vho lingedza u amba na Masipala wa Tshiṱiriki tsha Vhembe, sa izwi hu vhone vhaṋetshedzi vha tshumelo ya maḓi wa tshiofisi, u itela u thoma themamveledziso dza u ṋetshedza maḓi kha vhadzulapo vha muvhunduni. Nga ṅwaha wa 2023, nga murahu ha u lingedza lunzhi hu sa bveleli, vhadzulapo vho dzhia tsheo ya u thoma thandela ya Maḓi ya Sanzhe Lufhena.
Vho thoma vha amba na murangaphanḓa wa mvelele vha vhupo uhu, vhe vha vha ṋea fhethu hune vha nga kona u gwa gwedzho ḽa maḓi hone na u vhea matannga ane aḓo shumisiwa. Vho Tshikau vhari miṱa i paḓaho 104 yo ṋetshedza R3,300 nga muthihi, ye ya shumiswa u badela u gwa maḓi na u renga mathannga a swikaho 12 a maḓi. Vho ita na khumbelo ya muḓagasi kha vha Eskom na u vhea phaiphi dza maḓi muḓini muṅwe na muṅwe. Maḓi a u thoma o elela u bva kha mathannga nga Fulwana ṅwaha wo fhiraho, fhedzi zwo dzhia tshifhinga u itela u engedza nḓisedzo kha miṱa yoṱhe.
Nga Mugivhela wa ḽa 7 Nyendavhusiku, ho vha na vhuṱambo ngei Hamutsha Khwekhwe, he ha pembelelwa tswikelelo ya tshitshavha na u konḓelela kha u kunda khaedu ya nḓisedzo ya maḓi o kunaho kha vhadzulapo.
Muṅwe wa vhadzulapo vha muvhunduni vho takalaho, Vho Salphina Ndou, vho amba zwauri vho takadzwa nga tshilavhelelwa tsha u vha na maḓi o kunaho a bvaho kha dzi phaiphi hayani havho. Vho humbula nḓila ye vha konḓelela ngayo vhuleme lwa miṅwaha minzhi, vha tshi shumisa maḓi ane a dovha hafhu u shumiswa nga zwifuwo na zwipuka zwa tsini. U itela u wana maḓi o kunaho, kanzhi vho vha vha tshi fanela u badela mitengo ya nṱha kha vharengisi vha maḓi kana vhadzulapo vha re na maḓi o gwiwaho miḓini yavho.
Murangaphanḓa wa sialala wa Hamutsha Khwekhwe, Vhamusanda Vho Azwifhulufhedzi William Mulaudzi, vhari vhukando ha u tsireledza maḓi ho bva kha vhadzulapo vha muvhundu vhone vhaṋe. "Sa murangaphanḓa wa mvelele, ndo vha ṋea fhethu hune vha nga bveledza hone heyi phurojeke ya maḓi, nahone ṋamusi, vhadzulapo vha khou wana maḓi o kunaho u bva kha phaiphi dzavho," vha amba.