Tshiṱori nga: Kaizer Nengovhela. Ṱhalutshedzo nga: Khathutshelo Raliphaswa.
Vhadzulapo vha vhupo ha Kutama vha khou pomoka Thovhele Vele Kutama u rengisa masimu a vhadzulapo vha sina thendelo u bva kha avho vhadzulapo. Nga Musumbuluwo wa ḽa nṋa Khubvumedzi, vhadzulapo hu tshi katelwa na vhagudiswa, vho gwalaba vha tshi isa mbilaelo dzavho kha khoro ya musanda ya Kutama.
Khuḓano vhukati ha Thovhele Kutama na vhadzulapo zwi khou sumbedza dzi sa athu u lamulwa. Kha mveledziso dza u fhedzisela, vhadzulapo vhovha vha khou pomoka Thovhele Kutama uri vho rengisa masimu nga nḓila ya tshikhetho vha sa ṱhonifhi pfanelo dza vhathu vhane vha dzula afho.
Hovha na miṱangano ya tshivhalo Hakutama, he vhadzulapo vhanzhi vha ṱahisa vhupfiwa havho na mbilaelo dzavho nga nḓila ine Thovhele vha khou dzudzanya mafhungo ngayo. Vhadzulapo vha khou pomoka Thovhele uri vha khou vhatambudza nga u rengisa masimu avho vha tshi rengisela vhane vha bva nnḓa vha songo ṋeiwa thendelo ngavhane vhamasimu.
Uya nga muimeleli wa vhadzulapo, Vho Musundwa Mafaneza, vho ya kha Thovhele vha tshi ṱoḓa u vhudzisa nga ha thengiso ya masimu avho, vha tshi fhindula vhari mavu ndi avho. "Rovha ro mangala na u sinyuwa nga maipfi avho sa murangaphanḓa washu vhane ra vha fulufhela na u vha ṱhonifha," vha amba.
Vha tshi fhindula kha u pomokwa uhu na u gwalaba ha vhadzulapo, Thovhele vhari vha a ḓivha nga ha u gwalabiwa. Vho khwaṱhisedza uri vho wana mbilaelo dza vhadzulapo vha amba na uri khoro, ire na vhamusanda vha ṱahe u bva kha mivhindu ire fhasi havho, vha ḓo sedzulusa mavharivhari ayo. Thovhele vho fulufhedzisa uri vhadzulapo vha ḓo wana phindulo hu sa athu u fhela maḓuvha a sumbe.